1 Nuuni di7etida laatamanne ichashantho laythan, Yerusalaamey xoonetida tammanne oyddantho laythan, koyro ageenan, tammantho gallasan Godaa kushey ta bolla de7ees. I tana denthidi Yerusalaame efis. 2 Xoossay tana qoncethan Isra7eele biitta efidi, issi zuma bolla essis. He zumaape dugeha baggara daro keethi keexetida katama daaniyaba be7as. 3 I tana yaa efin taani naase biratada phooliya issi addiya be7as. He uray liinope oosetida wodoronne wadha xam7a oykidi, dirsa pengiya matan eqis. 4 I taako, “Asa na7aw, ta nena ha bessaa ehiday ta nena bessiyaba ubbaa ne mintha akeekana melasa. Hessa gisho, ne ayfiyan xeella; ne haythan si7a; ne wozanan wotha. Ne be7iyaba ubbaa Isra7eele asaas oda” yaagis.

5 Taani Xoossa keetha yuuyi aadhida dirsa gimbiya be7as. He addiya kushen usupun wadha adusse gidida xam7i de7ees. Issi adussa wadhay issi wadho bolla oyddu biradheta guja gidees. Dirsa gimbiya likiya wode dalgatethay issi wadhanne takadho; gompaynne adussatethay usupun wadha.

6 Hessafe guye, doloha baggara de7iya dirsa pengiyako bis. Dethaa keyidi, geliya pengiya wadhiya wode usupun wadha gidis. 7 Yaara aadhiya wode ushacharanne haddirsara penge naageysati eqiya heedzu heedzu kifileti de7oosona. Issi issi kifiley usupun wadha adussenne usupun wadha dalga. Enta giddon de7iya godati ichashu wadha orde. Pengiya naageysata kifiletape ya baggara, Xoossa keethako simmida usupun wadha barandi de7ees.

8 He uray geliya bessaa barandaa wadhin, hospun wadha gidis. 9 Xoossa keethaako simmida pengey wursethan de7ees. He barandaa tuuqeta ordetethay nam7u wadha. 10 Doloha bagga pengiyan ushachaninne haddirsa baggan issi gina gidida heedzu naago keethi de7ees.

11 He uray dirsa pengiya wadhiya wode dalgatethay tammu wadha, adussatethay tammanne heedzu wadha. 12 Issi issi penge naageysata kifiliya sinthan adussatethay issi wadha, dalgatethay issi wadha gidida godi de7ees; naageysata kifileti nam7u baggara usupun usupun wadha.

13 Hafinthan de7iya naageysata kifileti guye baggafe hefinthan de7iya naageysata kifileta guye bagga gakanaw de7iya bessay laatamanne ichashu wadha gidis. 14 He uray dabaaba sinthan de7iya wursetha kifiliya wadhin, laatamu wadha gidis. 15 Pengiya geliya bessaafe bidi, wursethan de7iya iya barandaa gakanaw de7iya pengiya adussatethay ishatamu wadha. 16 Kifileta ubbaas kare bagga simmida guutha maskooteti de7oosona; kifiletape giddon de7iya godatas maskooteti de7oosona. Yaanne haanne shaakiya godata bolla zamba misiley de7ees.

17 He uray tana kare dabaabako efis. Yan taani dabaaba yuushon de7iya shuchi hiixetida baasuwanne he baasuwa keexetida hastamu kifileta be7as. 18 Shuchay hiixetida baasoy dabaaba yuusho ubbaa gakis; kare dabaabay giddo dabaabape ziqees. 19 Giddo dabaaba gathiya, dhoqan oosetida, dirsa pengey de7ees. He uray nam7u pengetape giddon de7iya bessaa wadhin, gompay wuloha bagga xeetu wadha doloha baggay xeetu wadha gidis.

20 He uray tana qommo bagga efidi, kare bagga dabaaba sinthan de7iya dirsa pengiya wadhis. 21 Wulohape ushachaninne haddirsa baggara de7iya heedzu naageysata kifileti, entafe giddon de7iya godatinne iya baranday koyro doloha pengiya baggan wadhin issi gina gididosona. Dirsa penge adussatethay ichashu wadha; dalgatethay laatamanne ichashu wadha. 22 Baranday, maskootetinne zamba misiley kase doloha pengiya baggan be7idaysada issi gina. Yaa gathiya laapun dethati de7oosona. Baranday dabaaba sintha baggara de7ees. 23 Doloha baggan, qommo bagga giddo dabaabas hara pengey de7ees. He uray ha nam7u dirsa pengetape giddon de7iya bessaa wadhin, xeetu wadha gidis.

24 He uray tana garsa bagga dirsa pengiyako kaalethin, yan hara dirsa penge be7as. I tuuqetanne gido kifileta wadhiya wode haratara gina gidis. 25 He dirsa pengiya matan de7iya kifileta ubbaas maskooteti de7oosona. Dirsaa pengiya adussatethay ishatamu wadha; dalgatethay laatamanne ichashu wadha. 26 Yaa gathiya laapun dethati de7oosona. Baranday dabaaba sinthan de7ees. Pengiya bolla ya baggaranne ha baggara zamba misiley de7ees. 27 Giddo dabaabas hara pengey de7ees. He uray ha nam7u dirsa pengetape giddon de7iya bessaa wadhin, xeetu wadha gidis.

28 He uray tana garsa dirsa pengiya baggara giddo dabaabako efis. I dirsa pengiya wadhin, hara pengetara gina gidis. 29 Naageyisata kifileti, godatinne barandati ubbay hara dirsa pengetara issi gina. He dirsa pengiya yuushon de7iya kifileta ubbaas maskooteti de7oosona. Ha pengiya adussatethay ishatamu wadha; gompay laatamanne ichashu wadha. 30 He dirsa pengey yuushuwan barandati de7oosona; enta adussatethay laatamanne ichashu wadha; gompay ichashu wadha. 31 He barandati kare bagga dabaaba sinthan de7oosona. Pengiya bolla ya baggaranne ha baggara zamba misiley de7ees. Yaa gathiya hospun dethati de7oosona.

32 He uray tana doloha bagga dirsa pengiyara giddo dabaabako efis. I he dirsa pengiya wadhin, hara pengetara gina gidis. 33 Naageyisata kifileti, godatinne baranday hanko dirsa pengetara issi gina. He dirsa pengiya yuushon de7iya kifileta ubbaas maskooteti de7oosona. He pengiya adussatethay ishatamu wadha; gompay laatamanne ichashu wadha. 34 Baranday kare bagga dabaaba sinthan de7ees. Pengiya bolla ya baggaranne ha baggara zamba misiley de7ees. Yaa gathiya hospun dethati de7oosona.

35 He uray tana pudeha bagga dirsa pengiyako efis. I he dirsa pengiya wadhin, hanko pengetara issi gina gidis. 36 Naageyisata kifileti, godatinne baranday hanko dirsa pengetara issi gina. He dirsa pengiya yuushon maskooteti de7oosona. He pengiya adussatethay ishatamu wadha; gompay laatamanne ichashu wadha. 37 Baranday kare bagga dabaaba sinthan de7ees. Pengiya bolla ya baggaranne ha baggara zamba misiley de7ees. Yaa gathiya hospun dethati de7oosona.

38 Kare dabaaba qommo baggara, giddo dirsa pengiya barandaara oyketidi, hara kifiley de7ees. Xuussa yarsho ehiya mehe ashoy meecetey he kifiliyana. 39 He barandan ha baggara nam7u xarpheezati, ya baggara nam7u xarpheezati de7oosona; xuussa yarshos, nagara yarshosinne naaqo yarshos mehe ubbay shuketiya he xarpheezata bollana. 40 Barandaafe kare baggara qommo dirsa pengiya matan nam7u xarpheezati ha baggara, nam7u xarpheezati ya baggara de7oosona. 41 Hessa gisho, yarshos shiiqida mehey shuketiya hospun xarpheezati de7oosona; entafe oyddati barandan de7oosona; oyddati kare dabaaban de7oosona. 42 Xuussa yarsho wothanaw giigisida, shuchafe masetidi oosetida oyddu xarpheezati de7oosona. Entaw adusatethay issi wadhanne takadho; dalgatethay issi wadhanne takadho geesay issi wadhanne takadho. Xuussa yarshonne hara yarsho ubbaa shukiya miisheti he xarpheezata bolla uttoosona. 43 Oyddu biradhe aduqiya kaqota godaa bolla yuuyi aadhidi dhishetidi uttidosona. Yarshos shiishiya asho ubbay he xarpheezata bolla uttees.

44 He uray tana giddo dabaaba gelsis. Yan pengeti giddo dabaabako dooyetiya nam7u kifileti de7oosona. Entafe issi kifiley qommo dirsa pengiya matara garsa bagga simmis; nam7anthoy garsa dirsa pengiya matara qommo bagga simmis. 45 He uray, “Dugeha bagga simmida kifiley Xoossa keethan oothiya kahinetaba. 46 Qommo bagga simmida kifiley yarsho bessan oothiya kahinetaba. Kahineti ubbay Saadoqa yaraape yeletida Leeweta; Godaa sinthan eqidi oothanaw besseysati haysata xalaala” yaagis.

47 He uray dabaaba wadhin, adusatethay xeetu wadha, dalgatethay xeetu wadha gidis. Dabaaban Xoossa keethafe sintha baggara issi yarsho bessi de7ees. 48 I tana Xoossa keetha barandaako efis. Barandaa geliya bessan eqida gobaneta13 wadhin, adussatethay ichashu wadha; dalgatethay tammanne oyddu wadha. Haddirsaranne ushachara de7iya godata ordetethay heedzu wadha gidis. 49 Barandaa adussatethay laatamu wadha; gompay tammu wadha. Yaa gathiya tammu dethati de7oosona. Geliya bessan ushacharanne haddirsara eqida nam7u tuuqeti de7oosona.