1 Hessafe guye, he uray tana Xoossaa keethan de7iya Geeshsha Bessaa gelsis. He Geeshsha Bessaa giddora aathiya ogiya likin usupun wadha gidis. 2 Gompay tammu wadha gidis. Haddirsaranne ushachara de7iya godata gompay ichashu wadha. I Geeshsha Bessaa wadhin adussatethay oytamu wadha, gompay laatamu wadha gidis.

3 Hessafe guye, qol7a gelis. Qol7a geliya ogiya wadhin, nam7u wadha gidis; gompay usupun wadha gidis; haddirsaranne ushachara de7iya godata gompay laapun wadha gidis. 4 I qol7a wadhin, adussatethay laatamu wadha, dalgatethay laatamu wadha gidis. Hessafe guye, “Haysi Ubbaafe Geeshsha Bessaa” yaagis.

5 He uray Xoossaa keethaa godaa wadhin, ordetethay usupun wadha gidis. He godaara oyketidi, Xoossaa keetha gido bagga yuushuwan keexetida oyddu oyddu wadha dalgiya daro kifileti de7oosona. 6 He kifileti issoy issuwa bolla keexetida heedzu pooqe gidin, issi issi pooqiya bolla hastamu kifileti de7oosona. Gimbiya yuushon de7iya kifileta tookiya tuuqeti de7oosona. Shin he tuuqeti gimbiya giddo kumethi gelibookona. 7 Xoossa keethaa yuushon de7iya kifileta dalgatethay pooqey gujiya wode gujees. Xoossa keethaa yuushon de7iya keethaa oosoy garsafe pude dalgishe biya gisho keethay pude guzhetida wode ubban kifileta dalgatethay gujishe bees. Giddo pooqiyara kanthidi, qommo wursetha pooqiya gakanaw efiya dethati de7oosona.

8 Xoossa keethaa yuushon dhoqu gida baasoy de7eysa be7as. Iya yuushuwan de7iya kifileti he baasuwa bolla keexetidosona; he baasoy giddo dabaabape usupun wadha dhoqees. 9 He kifileta kare bagga godaa ordetethay ichashu wadha. Kaysa bessay Xoossa keethaafenne, 10 kahineta kifiliyape giddon de7ees; iya ordetethay laatamu wadha. 11 Kaysa bessaafe ushachaninne haddirsa baggan de7iya kifileta gelsiya pengeti de7oosona. He pengeti issoy qommo baggara, issoy qassi garsa baggara de7ees. Kaysa bessaa yuushuwa gasethiya baasuwa dalgatethay ichashu wadha.

12 Xoossa keethafe wuloha baggara de7iya kaysa bessaafe sintha baggara issi keethi de7ees. He keethaa adussatethay uddufun tammu wadha; gompay laapun tammu wadha. He keethaa godaa ordetethay ichashu wadha.

13 He uray Xoossa keetha kare baggaa wadhin, adusatethay xeetu wadha. Xoossa keethaafe guye baggara de7iya kaysa bessaa kanthidi wuloha bagga keethaa gakanaw de7iya bessaa wadhin xeetu wadha gidis. 14 Doloha baggara de7iya Xoossaa keetha gompay nam7u kaysa bessata gujidi wadhin xeetu wadha gidis. 15 Nam7u baggara de7iya aadhiya bessata gujidi, wuloha baggara de7iya keetha adussatethaa wadhin, xeetu wadha gidis.

Xoossaa keetha Geeshsha Bessay, iya qol7aynne iya baranday 16 wuygepe bidi, maskooteta gakanaw de7iya bessay mithan licetidi uttis; maskootetika mithan licetidi uttidosona. 17 Xoossa keetha soo bagga kifileta goday, pengetape bolla aadhana gakanaw alleeqetidi uttis. 18 Kifileta yuushon, zamba mithaninne kiruubeta misiley alleeqetis. He zamba mitha misileti alleeqetiday nam7u kiruubetape giddona. Kiruubetas nam7u nam7u som7oy de7ees. 19 Issi baggara asa som7o daaniya som7oy zamba misiliya xeellees; hanko baggara gaammo som7o daaniya som7oy zamba misiliya xeellees. 20 Geeshsha bessi wuygepe bidi, pengetape bolla baggan de7iya bessaa gakanaw, godaa yuusho ubbay hessada alleeqetis. 21 Xoossa keetha penge xangeti ubbay oyddu maazaney de7iya ubbay issi like.

Ubbaafe Geeshsha Bessaa geliya bessaa sinthan 22 mithafe oosetida yarsho bessi daaniya bessi bentees. Ika oyddu maazaney gididi, dalgatethaynne adussatethay issi gina; issoy issoy nam7u wadha; adussatethay heedzu wadha. Maazaneta tuussati, baasotinne miye baggan de7iya sanqati ubbay mithafe oosetidosona. He uray taako, “Haysi Godaa sinthan de7iya xarpheeza” yaagis.

23 Geeshsha Bessaa gelsiya issi pengey de7ees; Ubbaafe Geeshsha Bessaa gelsiya issi pengey de7ees. 24 Issi issi pengiyas giddon daakotidi dooyetiya nam7u sanqati de7oosona. 25 Godata bolla medhetidaysada Geeshsha Bessaa pengeta sanqata bolla kiruubetanne zambata misiley medhetidi uttis. Gaathi geliya kifiliya sinthan, kare baggara mithafe oosetida kami de7ees. 26 He kifiliya geliya godata miyen maskooteti de7oosona. Godati zamba misilen alleeqetidosona. He kifiliya geliya ushachaninne haddirsan de7iya kifileta dethaa baggara kammiya kaari de7ees.