1 Laapuntha ageenan Isra7eele asay banta de7iya katamatape issi asi gididi Yerusalaame shiiqidosona. 2 Iyosadeqa na7aa Iyyasunne iyara oothiya kahineti, Salatiyaala na7aa Zarubaabelinne iya dabboti Xoossaa asi gidida Muse higgiyan xaafetidaysada xuussa yarsho yarshanaw, Isra7eele Xoossaas yarsho bessi giigisidosona. 3 He biittan de7iya asaa ixuwape dendoysan yayyikoka, yarsho bessi kase bessan keexidi, xuu yarsho Godaas ubba wode wontanne omarsi shiishidosona. 4 Kase xaafetidaysada Shaqara Ba7aale bonchidosona; xuussa yarsho issi issi gallas koshsheysada pacisonna yarshidosona. 5 Qassi ubba wode shiiqiya xuussa yarsho, ageena xeero yarshonne Godaa geeshsha ba7aaletan yarshiya yarsho ubbaa yarshidosona. Hesaa bollaka asay ba dosan Godaas immida imota ubbaa yarshidosona. 6 Xoossa keetha baasoy buroo doometonaba gidikoka Laapuntha ageenan koyro gallas enti Godaas xuussa yarsho shiisho doomidosona.

7 Hessafe guye, shuchu masseysatasinne anaaxetas miishe immidi ooso oykidosona. Farse kawoy Qiroosi entaw kiitida gisho, Libaanoosape ziga abba pinthidi, Yoophe ehanaw Sidoonanne Xiroosa asaas kathi, ushshinne zayte immidosona.

8 Enti Yerusalaame simmida nam7antho laythan nam7antho ageenan, Salatiyaala na7ay Zarubaabeli, Iyosadeqa na7aa Iyyasuynne enta dabboti, kahineti, Leewetinne di7ope simmida asa ubbay Xoossa keetha kase bessan keexo doomidosona. Qassi Xoossa keetha oosuwa aawatethan xeellana mela laatamu laythi gididaysatanne laatamu laythafe aadhida Leeweta shuumidosona. 9 Leewe koche gidida Iyyasu, iya naytanne iya dabboti, Hodawa soo asi gidida Qadimi7eelinne iya nayti issife gididi, Xoossa oosuwa oosisana mela aawatethi ekidosona; Enhadada koche gidida Leeweti enta maaddidosona.

10 Anaaxeti Xoossa keethaa baasuwa yegethi oykiya wode, kahineti banta ma7o ma7idi moyze oykidi, Asaafa koche gidida, Leeweti daala oykidi, Isra7eele kawa Dawita wogaa mela Godaa galatanaw eqidosona. 11 Enti Godaa galatishenne issoy issuwa kaali kaali mazmuren sabbishe, haysada yaagidi zammaridosona.