1 Yihudasinne Biniyaames morke gidida asay, di7ope simmidaysati Godaas, Isra7eele Xoossas keethe keexeysa si7idosona. 2 Zarubaabelakonne Isra7eele yara halaqatako yidi, “Asoore kawoy Asiradooni nuna ha bessaa ehida gallasape doomidi, nuka hinte Xoossa goyinnoos, iyaw yarshoos. Hessa gisho, nuka hintera keexana” yaagidosona.

3 Shin Zarubaabeli, Iyyasuynne Isra7eele yara halaqati, “Nu Xoossaa keetha keexanaw nuusinne hintew gishoy baawa. Shin Farse kawoy Qiroosi kiittidaysada Godaa, Isra7eele Xoossa keetha nuuni nu xalaala keexana” yaagidosona.

4 Hessafe guye, he biittan de7iya asay, Yihuda asay Xoossa keetha keexonna mela ufaysi qanxisanawunne yashisanaw dendidosona. 5 Farse kawa Qiroosa laythafe bidi Daariyosa kawotetha gakanaw enti Yihuda asaa zoreta laallana mela ase shammidosona.

6 Arxekisisi kawotida wode Yihudanne Yerusalaame asaa mootanaw payle dooyidosona.

7 Arxekisisa kawotetha laythan, Bishilaami, Mitridaati, Xabeelinne enta bagga gididi, Farse kawa Arxekisisas dabdaabe xaafidosona; he dabdaabey Aramike pidaleninne doonan xaafetis.

8 Biitta aysiya Rehuuminne xaafey Simsayi Yerusalaameba haysada yaagidi, kawa Arxekisisas dabdaabe xaafidosona; 9 “Ha dabdaabey biitta aysiya Rehuumape, xaafiya Simsayape, Beteraplesape, Farsepe, Arkafe, Babiloonepe Suusapenne Elama biittan de7iya daynnatapenne biitta ayseysafe, 10 qassi gitanne bonchetida kawa Asnafaari di77idi Samaareninne Efraxiisa Shaafape hefinthan wothida asa ubbaafe xaafetis” yaagidosona.

11 Enta dabdaabey haysada yaagees; “Kawa Arxekisisas, Efraxiisa Shaafape hefinthan de7iya ne moorinatape yedetida dabdaabe.

12 “Kawaw, ne matape nuuko yida Ayhudeti Yerusalaame yidi, ha makallanne iita katamiw zaaridi keexo bolla de7eysa era. I gimbe dirsa oorathosona; I baasuwa yeggoosona; I xaphuwa minthoosona. 13 Hessa bolla qassi, ha katamiya keexetikonne I dirsa gimbey ooraxiko enti giiranne qaraxa qanxonnaysa era; kawo keethi geliya miishey guuxanaysa akeeka. 14 Nuuni kawoy shuumin ootheyisata gidiya gishonne kawoy kawuyishin be7anaw koyonna gisho haysa ne erana mela gidi odoos. 15 Hessa gisho, kase ne aawata taarike maxaafay koyetidi xeeleto; he xaafetidabape ha katamiya makallanne kawotasinne biittatas meto medhashe de7idaysa eranaw danda7aasa; hessa gaason iya laaletasu. 16 Ha katamiya keexetiyanne I dirsa gimbey ooraxiyaba gidiko, Efraxiisa Shaafape hefinthan de7iya biittay ne kushepe keydaysa era” yaagidosona.

17 Kawoy haysada giya zaaro entaw yeddis; “Biitta aysiya Rehuuma, xaafiya Simsaya, Samaareninne Efraxiisa Shaafape hefinthan de7iya entara issifida asaa saro gayis. 18 Hinte taw yeddida dabdaabey birshetidi nabbabetin si7as. 19 Ta kiitan, kase taarikey koyetidi xeeletiya wode, ha katamiya benipeka kawotas makallanne meto medhashe de7iya biitta gideysi eretis. 20 Yerusalaamen wolqaama kawoti kawotidosona; Efraxiisa Shaafape hefinthan de7iya Biittafeka he kawoti giiranne qaraxa ekidosona. 21 Hessa gisho, taani entaw ha kiita immana gakanaw, ha asati he katamiw keexeysa essana mela odite. 22 Hinte ha oda qelli goonna mela naagetite; kawotas meto darsanaw koshshenna” yaagidi kiittis.

23 Kawa Arxekisisa dabdaabey Rehuumas, xaafiya Simsayasinne entara de7iya ubbaas nabbabetida wode Yerusalaamen de7iya Ayhudetako ellesi bidi, enti keexeysa wolqan essidosona.

24 He wodepe doomidi Yerusalaamen de7iya Xoossaa keetha oosoy Daariyosi kawotida nam7antho laythi gakanaw eqis.