5
Tantani Daariyosas Xaafida Dabdaabe
1 He wode nam7u nabeti Haggeynne Zakaryaasi Yihudaninne Yerusalaamen de7iya Ayhude asaas Isra7eele Xoossa sunthan tinbite odidosona. 2 Salatiyaala na7ay Zarubaabelinne Iyosadeqa na7ay Iyyasuy dendidi, Yerusalaamen de7iya Godaa keethaa zaaridi keexanaw doomidosona. Xoossaa nabetika enta maaddishe entara de7idosona.
3 He wode Efraxiisa Shaafape hefinthan de7iya biitta aysiya Tantani, Satarbuzaninne entara de7eysati Yerusalaame yidi, “Ha keetha hinte keexana mala hintew maata immiday oonee?” yaagidi oychidosona. 4 Qassi, “Ha keetha keexiya asata sunthay oonee?” yaagidi oychidosona. 5 Shin Xoossa ayfey Yihuda cimata bolla de7iya gisho, ha oday Daariyosako gakin, dabdaabey yaana gakanaw enta oonika ooso digibenna.
6 Efraxiisa Shaafape hefintha biitta aysiya Tantanaya, Satarbuzaninne entara oothiya kawa Daariyosas xaafida dabdaabey haysa. 7 Enti iyaw yeddida dabdaabey haysada yaagidi nabbabetees.
Kawa Daariyosa, saroy new gido.
8 Nuuni Yihuda biittan de7iya gita Xoossaa keetha bidi be7idaysa kawoy ero. He Xoossa keethay gita shuchan keexetis; gimbe tuussati keyidosona; oosoyka gita akeekaninne eeson oosetishe de7ees.
9 “Nuuni, Ha keetha keexana mala hintew maata immiday oonee?” yaagidi cimata oychida. 10 Qassi entana kaalethiya asata sunthay ooneko xaafidi nena erisanaw enta oychida.
11 Enti haysada yaagidi zaaridosona:
“Nuuni salonne sa7a Xoossaa aylleta; nuuni daro laythafe kase gita Isra7eele kawoy keexidi polida keetha zaaridi keexoos. 12 Nu aawati salo Xoossaa hanqethida gisho, I enta Babiloone kawa Nabukadanaxoora kushen aathidi immis. I ha keethaa laallis; asaa di77idi Babiloone biitta efis.”
13 “Shin Babiloone kawoy Qiroosi ba kawotida koyro laythan, Xoossaa keethaa zaari keexana mela awaajo kessis. 14 Nabukadanaxoori Yerusalaamen de7iya Xoossa keethaafe eki efidi, Babiloone biittan de7iya ba kawo gadhon wothida worqanne bira miishetaka Qiroosi zaaridi yeddis. He miisheti kawoy Qiroosi Yihuda biitta aysana mela doorida Sesabisaara kushen imetis. 15 Kawoy, ‘Ha miisheta eka efada Yerusalaamen de7iya Xoossa keethan wotha; Xoossa keethayka kase de7iya bessan keexeto’ yaagin, 16 Sesabisaari yidi, ‘Xoossa keethaa keexiya bessan Yerusalaamen baasis. I ha77i gakanaw wuribeenna; he wodepe doomidi, keexetishe de7ees’ ” yaagidosona.
17 “Hiza ha oday kawa ufaysiyaba gidiko, ane kawoy Qiroosi ha Xoossa keethaa Yerusalaamen keexana mela, tumaka awaajuwa kessidaako eranaw kase aadhida Babiloone kawota taarike mazgabey koyetidi xeeleto. Hessafe guye, kawoy ha oda waatanaw qopidaako nuna eriso” yaagidi xaafidosona.