6
Daariyosa Awaajuwa
1 Hessa gisho, kawoy Daariyosa kiitan, Babiloone de7iya miishe wothiya keethan de7iya taarike mazgabeta koydosona. 2 Meedona awurajan Ahimata kataman issi xaatha maxaafi bentis; he maxaafan xaafetidabay haysada yaagees:
3 “Kawoy Qiroosi ba kawotida koyro laythan, Yerusalaamen de7iya Xoossaa keethaa gisho, haysada giya awaajo kessis. Xoossaa keethay yarsho shiishiya bessi gididi zaari keexeto; iya baasoyka yegeto. He keetha adussatethay usupun tammu wadha, dalgatethay usupun tammu wadha gido. 4 Heedzu toho gita shuchan yuushsho, issi toho mitha tuussati yuuyo. Hessas koshshiya miishe ubbay kawo shalo minjiya keethaafe imeto. 5 Nabukadanaxoori Yerusalaamen de7iya Xoossa keethaafe ekidi, Babiloone ehida Xoossa keetha worqanne bira miisheti banta bessaa guye Yerusalaame simmidi; Xoossaa keethan de7o” yaagis.
6 Hessafe guye, Daariyosi xaafida dabdaabey haysada yaagees. “Hinteno Efraxiisa Shaafape hefintha biitta aysiya Tatanaya, Satarbozinyanne entara ootheysato, ha Xoossa keethako shiiqopite. 7 Ha Xoossaa keetha oosuwas dhube gidopite. Ayhudeta halaqatinne Ayhude cimati Xoossa keetha kase bessan zaaridi keexo.”
8 Hessa bolla qassi, “Ha Ayhude cimati Xoossa keetha keexiya wode, enti oothiya oosoy eqonna mela entaw koshshiya miishe ubbaa Efraxiisa Shaafape hefintha biittafe shiishida kawa giira miishiyape entaw immana mela taani kiittas. 9 Yerusalaamen de7iya kahineti salo Xoossas xuussa yarsho yarshanaw koshshiya wofaano gidin, maraze gidin woyko dorsa urge gidin entaw immite. Qassi aybaka pacisonna enti koyiya giste, maxine, woynenne zayte entaw gallas gallas immite. 10 Hessa hinte immey enti salo Xoossaa ufaysiya yarsho yarshanaasanne kawuwasinne iya naytas woossanaasa. 11 Ha awaajuwa laammiya oonika de7iko, iya keethaa tuussaa shoddidi, he tuussaa bolla iya kaqo; iya keethayka pito yeggiya besse gido. 12 Ha kiita laammanaw woyko Yerusalaamen de7iya Xoossaa keethaa laallanaw kushe denthiya ay kawoy woyko asi gidin, ba sunthay xeegetana mela Yerusalaame doorida Xoossay iya dhayso. Taani Daariyosi haysa kiittas. Ha ubbay minotethan poleto” yaagis.
Xoossa Keethi Anjiso Ba7aale
13 Hessafe guye, Efraxiisa Shaafape hefintha biitta aysiya Tatanaya, Satarbuzaninne entara oothiya ubbay kawoy Daariyosi kiittidaysada minotethan oothidi polidosona. 14 Ayhude cimati banta oosuwa aggonna oothidosona; qassi nabey Haggeynne Ido na7ay Zakaryaasi odida qaalan minetidosona. Isra7eele Xoossay kiittidaysada Farse kawoti Qiroosi, Daariyosinne Arxekisisi awaajidaysada Xoossa keetha keexidi wursidosona. 15 Daariyosi kawotida usupuntho laythan Adaare geetetiya ageenan heedzantho gallasan, Xoossaa keetha oosoy poletis.
16 Isra7eele asay, kahineti, Leewetinne di7ope simmida asa ubbay Xoossa keethaa anjisiya ba7aale ufaysan bonchidosona. 17 He ba7aaley bonchetiya wode enti issi xeetu korma, nam7u xeetu maraze, oyddu xeetu dorsa urgeta yarshidosona. Qassi nagara yarshos tammanne nam7u Isra7eele kochata taybon tammanne nam7u kole yarshidosona. 18 Muse Maxaafan xaafetidaysada, Yerusalaamen de7iya Xoossaa keethan oothana mela kahinetinne Leeweti enta maarada maarada wothidosona.
Paasika Ba7aale
19 Di7ope simmida asay koyro ageenan tammanne oyddantho gallas Paasika Ba7aale bonchidosona. 20 Kahinetinne Leeweti bantana geeshshidosona; enti ubbay wogada geeydosona. Leeweti di7ope simmida ubbaas, kahinetasinne bantaw Paasika dorse shukidosona. 21 Di7ope simmida Isra7eele asaynne Ayhude gidonna asay oothiya tunatethaafe bantana shaakidi, Godaako, Isra7eele Xoossaako simmida asa ubbay Paasika midosona. 22 Goday Asoore kawa qofa laammidi Isra7eele Godaa, Xoossa keethaa keexidi polana mela maaddida gisho, enti laapun gallas Uytha Ba7aale ufaysan bonchidosona.