1 Daro wodepe guye, Farse kawua Arxekisisi kawotida wode Izira geetetiya issi asi de7is. Iziri Saraya na7a; Azaara na7a; Kalqe na7a; 2 Saluma na7a; Saadoqa na7a; Akxuuba na7a; 3 Amaare na7a; Azaara na7a; Marayoota na7a; 4 Zaraha na7a; Oza na7a; Buqa na7a; 5 Abisu na7a; Finihaasa na7a; Finihaasi Alaazara na7a; kahine halaqa Aarona na7a.

6 Haysi Iziri Babiloonepe bis. Goday, Isra7eele Xoossay immida Muse higgiya eriya asi. Godaa, Xoossaa kushey iya bolla de7iya gisho, I oychidaba ubbaa kawoy iyaw immis. 7 Kawoy Arxekisisi kawotida laapuntha laythan Isra7eele asaape guuthatara, kahineti, Leeweti, zammaareti, penge naageysatinne Xoossaa keetha oosanchoti Izirara issife Yerusalaame bidosona. 8 Kawoy kawotida laapuntha laythan ichashantho ageenan Iziri Yerusalaame gakis. 9 Xoossaa lo77o kushey iya bolla de7iya gisho koyro ageenan koyro gallassi Babiloonepe keyidi, ichashantho ageenan koyro gallas Yerusalaame gakis. 10 Iziri Godaa higgiya xanna7on, ooso bolla peeshoninne Isra7eele asaa iya wogaanne iya higgiya tamaarsanaw ba wozanaa giigisis.

11 Goday Isra7eeles immida higgiyanne wogga, loythi eriya kahinenne xaafe gidida Iziras kawoy Arxekisisi xaafida dabdaabey haysa.

12 “Kawota Kawa Arxekisisape, kahinenne salo Xoossa higge loythi eriya Iziras, saroy new gido!

13 “Ta kawotetha giddon de7iya Isra7eele asaape oonika, kahine woyko Leewe gidin, Yerusalaame baanaw koyiya asay neera baana mela taani kiittas. 14 Taaninne taara zorettiya laapun asati issife gididi, ne kushen de7iya Xoossaa higgiyada, bada Yihudaninne Yerusalaamen de7iya hanotethay ay meleko oychana mela nena kiittoos. 15 Yerusalaamen de7iya Isra7eele Xoossaas, taaninne taara zorettiya asati nu dosan immida worqanne bira imota ekada ba. 16 Hessa bolla qassi neeni Babiloone biitta kumethaafe demmida biraanne worqaa ubbaa, qassi Isra7eele asaynne kahineti Yerusalaamen de7iya banta Xoossaa keethas dosan immida imota ekada ba. 17 Ha miishiyan kormata, marazeta, dorsa urgetanne, katha yarshosinne ushsha yarshos koshshiyaba shammada, Yerusalaamen de7iya hinte Xoossaa keethan yarsho bessan yarsha.

18 “Hessafe palahida biraanne worqaa neeninne neera de7iya Ayhude gidida ne ishati hinte Xoossa shenen, hinte oothanaw koiyaba oothite. 19 Qassi nuuni hinte Xoossa keethaas, immida miisheta ubbaa Yerusalaame Xoossaa sinthan shiisha. 20 Hessafe harabay Xoossaa keethas koshshiyabay aybika de7iko, kawo miishe minjiya keethaafe ekanaw danda7aasa.

21 “Taani kawoy Arxekisisi Efraxiisa Shaafape hefinthan biittan de7iya miishe keethan aawatethay de7iya ubbatas ha kiita immas. Kahinenne Salo Xoossaa higgiya loythi eriya Iziri hintena oychiyabay ayba gidikoka iyaw immite. 22 Heedzu mukulunne oyddu xeetu kilo giraame bira, issi xeetu kuntaale giste, nam7u mukulu litiro woyne ushshi, nam7u mukulu litiro shamaho zaytenne koshshiya mela maxine iyaw immite. 23 Kawa bollanne kawa nayta kawotetha bolla hanqoy yoonna mela salo Xoossay ba keethas koyiyaba ubba immite. 24 Kahinetape, Leewetape, zammaaretape penge naageysatape, Xoossa keetha oosanchotapenne Xoossaa keetha giddon dumma dumma ooso oothiya asaape hinte giiranne qaraxa ekanaw hintew maati baawa.

25 “La Izira, neeni, new Xoossay immida cincatethan Efraxiisa Shaafape hefintha biittan de7iya ne Xoossaa higgiya eriya asaa bolla pirdana mela daynnatanne ayseysata shuuma. Higgiya eronna asi de7iko neeni enta tamaarsa. 26 Ne Xoossaa higgiyanne kawa higgiya kiitetonna oonika de7iko, I qadhey bayna hayqo woyko gadepe goodeto woyko iya shaloy bonqeto woyko qashon seereto” yaagis.

27 Yerusalaamen de7iya Xoossa keethaa haysada bonchetana mela kawa wozanan ha qofaa wothida Godaa, nu aawata Xoossaa galati gako! 28 Kawa, kawuwara zoreteysatanne iyara oothiya wolqaama halaqata sinthan ba teema taw immida Xoossaas galati gido! Godaa, ta Xoossaa kushey taara de7iya gisho, Isra7eele halaqatape eretidaysata doorada Yerusalaame eka baana mela I taw minotethi gidis.