8
Izirara Di7ope Simmida Asa
1 Kawoy Arxekisisi kawotida wode taara issife Babiloone biittafe simmida soo asaa halaqati haysata;
2 Finihaasa yarape Gersoona, Itamaara yarape Daanela, Dawita yarape Sakana na7aa Haxusa,
3 Paroosa yarape Zakaryaasanne enta yeleta maaran xaafetida hara issi xeetanne ishatamu addeta.
4 Pahati-Moo7abe yarape Zaraha na7aa Eliho7enayanne iyara de7iya nam7u xeetu addeta.
5 Zata yarape Yahazi7eela na7a Sakananne iyara de7iya heedzu xeetu addeta.
6 Adina yarape Yoonataana na7aa Ebeedanne ishatamu addeta.
7 Elama yarape Gotola na7a Yishayanne iyara de7iya laapun tammu addeta.
8 Safaaxa yarape Mika7eela na7a Zibaadanne iyara de7iya hospun tammu addeta.
9 Iyo7aaba yarape Yi7eela na7a Abdiyunne iyara de7iya nam7u xeetanne tammanne hospun addeta.
10 Baana yarape Yosifiya na7a Salomitanne iyara de7iya issi xeetanne usupun tammu addeta.
11 Bebaya yaraape Bebaya na7aa Zakariyasanne iyara de7iya laatamanne hospun addeta,
12 Azgada yarape Haqaxaana na7a Yohaananne iyara de7iya issi xeetanne tammu addeta.
13 Adonqaama yarape wursethan simmidaysati, Elfalaxa, Yi7u7eela, Shamayanne entara de7iya usupun tammu addeta.
14 Bigiwaya yarape Utaya, Zakuranne entara issife hara laapun tammu addeta.
15 Taani Ahawako goggiya shaafa matan enta shiishas. Nuuni he bessan dunkaanidi, heedzu gallas takida. Taani he bessan de7iya asaanne kahineta taybiya wode Leewe yarape issi asika demmabike. 16 Hessa gisho, Alaazara, Ar7eela, Shamaya, Elnaatana, Yariba, Elnaatana, Naatana, Zakaryaasanne Masulaama geeteteysatanne cinca asi gidida Yoyaaribanne Elnaatana xeegas. 17 Enta Kasfiya geetetiya bessan Leewetas halaqanne Xoossa keetha oosancho gidida Adosinne iya dabotas odanaba akeekisada nu Xoossa keethan oothiya ase ehana mela kiittas. 18 Nu Xoossa lo77o kushey nu bolla de7iya gisho, Isra7eele na7a Leewe yara Mahila yaranne daro cinca asi gidida Sarebaya geetetiya addiya tammanne hospun iya naytanne iya ishata, nuus yeddidosona. 19 Hessadaka, Hashaba, Maraara yara gidida Yashaya, iya naytanne laatamu gidiya iya ishatara yeddidosona. 20 Hessa bolla kase aawati Leeweta maaddana mela Dawitanne iyara oothiya halaqati shuumida Xoossa keetha oosanchotape nam7u xeetanne laatamu asata yeddidosona. Hessati ubbay banta sunthan xaafetidosona.
21 Nu Xoossaa sinthan nu huuphiya kawushidi, ogey nuus, nu naytasinne nu shalo ubbaas saro gidana mela woossana mela yan Ahawa Shaafa matan xooma awaajas. 22 Kase nuuni kawas, “Nu Xoossaa lo77o kushey iya koyeyisata bolla de7ees; shin iya wolqaama hanqoy iya aggeyisata bolla de7ees” yaagidi odida gisho, nuuni biya ogiyan de7iya morketape nuna naagana mela wotaadarenne parata immanaada kawa oychanaw yeellatas. 23 Hessa gisho, nuuni xoomidi, Xoossa woossida; ika nu woosa si7is.
24 Kahine halaqatape Sarebaya, Hasabayanne hara enta dabbo gidida tammu asata dooras. 25 Kawoy, iyara zoreteysati, iya shuumatinne Isra7eele ubbay nu Xoossaa keethas immida bira, worqanne, hara miisheta ubbaa likada enta kushen wothas. 26 Taani entaw immidabay haysa; laatamanne nam7u mukulu kilo giraame bira, heedzu mukulunne oyddu xeetu kilo giraame birape oosetida miisheta, heedzu mukulunne oyddu xeetu kilo giraame worqa, 27 hospun kilo giraamenne oyddu xeetu giraame worqafe oosetida laatamu saanetanne worqada al7onne muruuto gidida naase biratape oosetida nam7u saaneta.
28 Hessafe guye, taani entako haysada yaagas; “Hintenne ha miisheti Godaas dummatideta; ha biraynne worqay, asay ba dosan Godaas, hinte aawata Xoossaas immida imota. 29 Yerusalaamen de7iya Xoossa keethan miishe minjiya keethaa gakidi, kahine halaqata sinthan, Leeweta sinthaninne Isra7eele yarata halaqata sinthan immana gakanaw, ha miisheta loythidi naagite” yaagas. 30 Hessa gisho, kahinetinne Leeweti Yerusalaamen de7iya Xoossa keethi efanaw bira, worqanne hara miisheta ubbaa mizaanen likidi aawatethan ekidosona.
31 Koyro ageenan tammanne nam7antho gallasan Yerusalaame baanaw Ahawa Shaafa matape dendida. Nu bolla de7iya nu Xoossaa lo77o kushey nu biya ogen de7iya morketapenne pangatape nuna ashshis. 32 Nuuni Yerusalaame gakidi, yan heedzu gallas shempida.
33 Oyddantho gallas bira, worqanne hara miisheta ubbaa likidi, Uraya na7aa kahiniya Maremootas immida. Finihaasa na7aa Alaazari, Leewe gidida Iyyasu na7aa Yozabaatinne Biniya na7a No7aadi iyara issife de7oosona. 34 Ubbabay he wode taybeti liketidi xaafetis.
35 Hessafe guye, di7ope simmida asay, Isra7eele Xoossaas, tammanne nam7u korma, uddufun tammanne usupun marazenne laapun tammanne laapun dorsa urgeta xuussa yarsho oothidi, qassi tammanne nam7u kole nagara yarsho oothidi Godaas yarshidosona. Hessi ubbay xuussa yarsho gididi Godaas shiiqis. 36 Kawoy kiitida kiittaka kawuwape garsara biitta ayseysatasinne Efraxiisa Shaafape hefintha biitta ayseysatas immidosona; enti Isra7eele asaanne Xoossa keethaa oosuwa maaddidosona.