1 Ha ubbay hanidaape guye, deriya kaaletheysati taako yidi, haysada yaagidosona; “Isra7eele asay, hari attoshin, kahineti, Leeweti, banta heeran de7iya, Kanaaneta, Hiteta, Parzeta, Yaabuseta, Amooneta, Moo7abeta, Gibxetanne Amooreta tunaape bantana shaakibookona. 2 Bantawunne banta naytas Ayhude gidonna macca naytape macho ekidosona; hessa gaason geeshsha zeretha Ayhude gidonna asaara walakidosona. Ha balan koyro gididay kaaletheysatanne halaqata” yaagidosona.

3 Taani ha oda si7ida wode ta ma7uwanne ta qamisiya daakas; ta huuphiyanne ta buuchaa sikas; daro dagammada utta aggas. 4 Di7ope simmida asay oothida nagaraa gisho, Isra7eele Xoossay odida qaalas yayyida asa ubbay taani de7iya bessaa taako shiiqidosona. Omarsa yarsho yarshiya wode gakanaw dagammada uttida bessaafe dendabike.

5 Shin omarsa yarshoy shiiqiya wode, ta ma7oynne ta qamisey daaketidi de7ishin, taani azzanada uttida bessaafe dendas. Gulbatada Godaako, ta Xoossaako, ta kushiya denthada, haysada yaagada woossas. 6 “Abeeti ta Xoossaw, nu nagaray dooretidi nu huuphiyape aadhida gishonne nu naaqoy salo gakida gisho taani ta som7uwa neeko denthanaw yayyaysinne yeellatayis. 7 Nuuni nu mayzata wodepe doomin, hachi gakanaw, nena daro naaqida. Nu nagaraa gaason nuuni, nu kawotinne nu kahineti ha77iysada allaga kawota kushen kundida; mashshas, do7os, bonqeesinne yeellas aadhidi imetida.

8 “Shin ha77i Goday nu Xoossay nuupe guutha asi ashshanawunne ba keethan nuus besse immanaw koyidi guutha wodes marotethi immis. Hessa gisho Xoossay nu ayfiya dooyis; nu aylletethan de7ishin guutha wodes shempo immis. 9 Nuuni aylle gidikoka, nu Xoossay nuna aylletethan aggibeenna; nu de7uwa oorathis. Nu Xoossaa keethaa keexana mela, laaletidaysa oorathana melanne Yihudaninne Yerusalaamen saro daana mela Farse kawota sinthan nuus teemo immis.

10 “Shin nu Xoossaw, ha77i yaatin, nuuni woyganee? Heko ha77ika ne kiita toochida. 11 Nu toochiday ne aylle gidida nabeta baggara ‘Hinte laattanaw geliya biittay, in de7iya asan tunidaaro; ha gaxape hini gaxaa gakanaw enta iita oosuwaninne tunatethan kumasu. 12 Hessa gisho, hinte mino gidana mela, he biitta ayfiya maana melanne merinaw hinte naytas laatisana mela, hinte macca nayta enta adde naytas immofite; enta macca nayta hinte adde naytas ekofite. Enti sarotethaninne duretethan daana mela amottofite’ yaagadasa.

13 “Nu bolla gakida iitaba ubbay nu iita oosuwanne nu gita nagara gaasona. Gidoshin, neeni nu Xoossay nu nagara darotethaa mela nuna pirdabaaka; shin nuupe guuthata ashshadasa. 14 Nuuni haysa mela tunabaa oothiya asaara ekoninne gelon walaketidi, waanidi ne kiita ixas gaanee? Ha attida guutha kochay dhayana gakanaw ne hanqoy nu bolla dareneyee? 15 Abeeti Godaw, Isra7eele Xoossaw, neeni xillo; nuuni ha77i gakanaw attidi de7on de7oos. Nu nagaraa gaason nuupe issoyka ne sinthan eqanaw danda7ey baawa; attidaysati hachi haysan ne sinthan de7oos” yaagas.