1 Abrahaamey Keexura geetetiya hara macho ekis. 2 Iya Zimiraana, Yoqsaana, Madaane, Midiyaame, Yasboqanne Siwa iyaw yelasu.

3 Yoqsaani Saabanne Dedaana yelis. Dedaani Ashooreta, Lexusetanne Le7umata yelis.

4 Midiyaame nayti Gefera, Efera, Henooha, Abidanne Elda. Haysati ubbay Keexura sheeshata.

5 Abrahaamey babaa ubbaa Yisaaqa laatisis. 6 Shin I paxa de7ishe, hara machetape yelida nayta baw de7iyabaape woytis. Ba na7a Yisaaqape enta shaakidi, doloha bagga biitta yeddis.

7 Abrahaamey kumethi issi xeetanne laapun tammanne ichashu laythi de7is. 8 Abrahaamey daro wode de7idi, lo77o cimidi, hayqidi ba mayzatan gahetis. 9 Iya nayti Yisaaqinne Isma7eeli iya Makifeela geetetiya gongolo duufuwan moogidosona; he gongoloy Mamire matan, Hite addiya Xohaara na7a Efroona gadiyan de7ees. 10 Hessi Abrahaamey Hitetape shammida gadiya. Abrahaamey ba machiya Saara moogetida duufuwan moogetis. 11 Abrahaamey hayqidaape guye, Xoossay iya na7a Yisaaqa anjis. He wode Yisaaqi, Beer-lay-ro7i (Tana Be7iya De7o Xoossa Pulto) geetetiya pultuwa matan de7ees.

12 Saara aylliya, Gibxefe yida Aggaara, Abrahaames yelida na7a Isma7eela yeletethay haysafe kaallidi xaafetidaysa. 13 Isma7eela nayti banta sunthaninne banta yeleta maaran haysata; entika, Nabayoota, Qedaare, Adbeela, Mibsaama, 14 Misima, Duma, Masa, 15 Kudane, Teema, Ixura, Nafisanne Qedima. 16 Isma7eela nayti haysata; enta sunthay enta moothaninne de7iya bessan haysa. Enti banta yaranka tammanne nam7u halaqata. 17 Isma7eeli kumethi xeetanne hastamanne laapun laythi de7idi, hayqidi ba mayzatan gahetis. 18 Isma7eela kocheti Gibxefe doloha baggan de7iya Hawilapenne Suurape gidduwan, Asoore efiya ogiya matan de7idosona. Enti banta ishata ubbara morketethan de7idosona.

19 Abrahaame na7a Yisaaqa yeletethay haysafe kaallidi xaafetidaysa; Abrahaamey Yisaaqa yelis. 20 Yisaaqas laythi oytama gidin, Irbiqa ekis; iya Masephexoomen de7iya Araame addiya Batu7eela na7iwunne Laaba michiw. 21 Yisaaqi ba machiya maynthi gidida gisho, iw Godaa woossis; Goday iya woosa si7is. Yaatin iya machiya Irbiqa qanthatasu. 22 Shin I ulon de7iya nayti mente gidi uttidi, issoy issuwara sugetidosona; iya, “haysi taw ayis hanii?” yaagasu. Hessa gisho, Godaa oychanaw basu.

23 Goday iyo, “Ne ulon nam7u kawotethi de7ees; qassi ne giddon de7iya nam7u dere asati issoy issuwafe shaaketana; issi dere asati hankotape minnana; qassi bayray kaaluwas kiitetana” yaagis.

24 Iwu yelo wodey gakin, I uluwan mente adde nayti de7oosona. 25 Koyro yeletidaysi aarise; iya bolla ubba ikisey ma7is; Hessa gisho, enti iya Eesawe (Iksaama) gidi sunthidosona. 26 Hessafe guye, iya ishay yeletis. I ba kushiyan Eesawe gindiya oykidi keyis, Hessa gisho, iya Yayqooba (Ginde Oykeysa) gidi sunthidosona. Irbiqa enta yelida wode Yisaaqas usupun tammu laythi gidis.

27 Nayti diccidosona; Eesawey shanka hiilla eriya bazzo ase gidis. Shin Yayqoobi dunkaanen de7iya wopa ase gidis. 28 Yisaaqi Eesawe dosis; ayis giiko, I shankateysafe maanaw dosees; shin Irbiqa Yayqooba dosawusu.

29 Issi wode Yayqoobi woxe kathishin, Eesawey koshatidi bazzofe yis. 30 Eesawey Yayqooba, “Tana ha zo7o woxiyape muza, tana koshi wodhees” yaagis. (Hessa gisho, qassi iya sunthay Edoome (Zo7o) geetetis).

31 Yayqoobi iya, “Koyro taw ne bayratetha bayza” yaagis.

32 Yaatin Eesawey, “Heko, taani hayqana hanayis, ha bayratethay tana ay maaddii?” yaagis.

33 Yayqoobi zaaridi, “Ane taw koyro caaqa” yaagis. I caaqis, ba bayratetha Yayqoobas bayzis. 34 Yayqoobi Eesawes uythinne misire woxe immin mis uyis. Hessafe guye dendidi bis. Eesawey ba bayratetha haysada kadhis.