1 He biittan kase Abrahaame wode keyida koshaape hara koshi keyis. Yaanin, Yisaaqi Filisxeeme kawa Abimelekeko Geraara bis. 2 Goday Yisaaqas qoncidi “Gibxe biitta duge boopa, taani new odida biittan de7a. 3 Ha biittan guutha wodiya gam7aasha, taani neera gidana, nena anjana. Ha biitta ubba taani newunne ne sheeshas immana. Taani ne aawa Abrahaames caaqida caaquwa polana. 4 Ne sheesha salo xoollintoda darsana, ha biitta ubba taani entaw immana. Sa7a kawotethati ubbay ne sheesha baggara anjetana. 5 Hessika, Abrahaamey ta qaala si7idi, ta awaajota, ta kiitatanne ta higgeta naagida gishosa” yaagis. 6 Hessa gisho, Yisaaqi Geraaran de7is.

7 He biitta asay Irbiqaba denthidi, “Hanna new aybee?” gidi Yisaaqa oychidosona.

I, “Hanna taw micho” yaagis. Hessa I giday, Irbiqa daro mala lo77o gidiya gisho, “Iya ta macho giiko, ha asay I gaason tana wodhana” yaagi qopidi babis.

8 Yisaaqi yan daro wode de7idaape guye, Filisxeeme kawoy Abimelekey maskootera duge xeelliyade, Yisaaqi ba mache Irbiqara kaa7ishin be7is. 9 Hessa gisho, Abimelekey Yisaaqa xeegisidi, “Heko, iya ne macho; neeni ayis iya ta micho gadii?” gidi oychis.

Yisaaqi, “Iya ta macho giiko, asay tana I gaason wodhana gada gas” yaagis.

10 Abimelekey, “Haysi neeni nu bolla oothidabay aybee? Ta asaape issi asi ne machera aqis shin atis, neeni nu bolla gome ehadasa” yaagis. 11 Hessa gisho, Abimelekey ba asa, “Ha ura woyko iya machiw bochiya oonika tuma hayqana” yaagidi kiittis.

12 Yisaaqi he biittan kathi zeridi, Goday iya anjida gisho he laythan xeetu kushe ekis. 13 I duretethan eretana gakanaw daro duretishe bis. 14 Yisaaqas dorsa wudey, miiza wudeynne aylleti aadhidi darida gisho, Filisxeeme asati iya qanaatidosona. 15 Hessa gisho, iya aawa Abrahaame wode iya aawa aylleti bookida haatha olla ubba Filisxeemeti biitta ushshidi kunthidosona.

16 He wode Abimelekey Yisaaqako, “Neeni nuupe aadhada minnida gisho nu matape ba” yaagis. 17 Yisaaqi hessafe dendidi, Geraara zangaara bidi dunkaane tokidi yan de7is. 18 Yisaaqi ba aawa Abrahaame wode booketida haatha ollata, Abrahaamey hayqidaape guye, Filisxeemeti kunthidaysata zaari booki kessidi, iya aaway sunthida sunthan xeegis.

19 Yisaaqa aylleti he zangaaran haatha olla bookidi yan lo77o pulto haatha demmidosona. 20 Shin Geraara henthanchoti Yisaaqa henthanchotara, “Haathay nubaa” yaagidi ooyetidosona. Enti palametida gisho, Yisaaqi he haatha olla “Eseeqa”*Eseeqa guussay Ibraawetho doonan palama guussu. gidi sunthis.

21 Hessafe guye, enti hara haatha olla bookidosona. Shin enti he haatha olla geedonka ooyetidosona. Hessa gisho, Yisaaqi he haatha olla “Siixina”†Siixina guussay Ibraawetho doonan morketethi guussu. gidi sunthis. 22 Hessafe guuthi sinthe shiiqidi hara haatha olla bookisis. Iya gaason oonika ooyetiboonna gisho, “Xoossay ha7i nuus dalgisis nuuni ha biittan darana” gidi he bessa Rehoboota‡Ibraawetho doonan ha qaala birshethay dalga bessi guussu. gidi sunthis.

23 Hessafe dendidi pude Barsaabe keyis. 24 He bida gallas qamma Goday iyaw qoncidi, “Taani ne aawa Abrahaame Xoossa, taani neera de7iya gisho, babofa. Ta aylliya Abrahaame gisho taani nena anjana, ne sheeshaka darsana” yaagis. 25 Yisaaqi yan yarsho bessi giigisidi Godaa suntha xeegis. Yan I ba dunkaaniya tokis, iya aylleti yan haatha olla bookidosona.

26 Hessafe guye, Abimelekey bana zoriya Ahuzanne toora mocona Fikoola ekidi, Geraarape Yisaaqako yis. 27 Yisaaqi entako, “Hinte kase tana ixidi, hinte biittafe kessi yeddibeeketii? Ha7i taako ay ekanaw yidetii?” yaagis.

28 Enti, “Goday neera de7eysa nuuni geeshshi erida. Hessa gisho, sarotetha caaqoy nu giddoninne ne giddon daanaw koshshees. 29 Nuuni nena bochibooko, new keehatetha xalaala oothidi, nena sarotethan moyzidi yeddida. Hessadaka neeni nu bolla iitaba oothonna mela, ane neera caaqoos. Tumaka ha7i nena Goday anjis” yaagidosona. 30 He wode Yisaaqi entaw gibira giigisin midosona, uyidosona. 31 Wontetha gallas wonta guura dendidi enti issoy issuwara caaqidosona. Yisaaqi enta moyzin, enti saro shaaketidi bidosona.

32 He gallas Yisaaqa aylleti yidi, “Nuuni haathe demmida” yaagidi banta bookida haatha ollaba iyaw odidosona. 33 I he haatha olla Saabe (Caaqo) gidi sunthis. Hessa gisho, he katama sunthay hachi gakanaw Barsaabe (Caaqo haatha olla) geetetees.

34 Eesawes laythi oytama gidida wode Hite addiya Bi7eera na7iw Yooditonne Hite addiya Eloona na7iw Basemaato machis. 35 Enti Yisaaqanne Irbiqa azzanthishe de7idosona.