1 Hessa gisho, Yisaaqi Yayqooba xeegidi, “Kanaane biitta macca naytape macho ekofa. 2 Dendada ne aaye aawa Batu7eelako Masephexoome biitta bada yaape ne aaye isha Laaba macca naytape macho eka. 3 Ubbaa Danda7iya Xoossay nena anjo, I new nayta immo, daro dere gidana gakanaw I nena darso. 4 Neeni ha7i betetethan uttida ha biitta nebaa oothana mela newunne ne sheeshas Xoossay Abrahaame anjuwa immo” yaagi anjidi kiittis. 5 Yaagidi Yisaaqi Yayqooba yeddis. Yayqoobi Masephexoome biitta Laabako bis. Laabi Yayqoobanne Eesawe aaye Irbiqa ishanne Araame addiya Batu7eela na7a.

6 Yisaaqi Yayqooba anjidi Masephexoome biittafe macho ekana mela iya yedidaysa, I Yayqooba anjida wode, “Kanaane maccas ekofa” gidi kiittidaysanne, 7 Yayqoobi ba aawasinne ba aayes kiitetidi Masephexoome biitta bidaysa, Eesawey eris. 8 Eesawey hessan Kanaane biitta maccas ba aawa Yisaaqi ay mela ixiyako eris. 9 Hessa gisho, Eesawey Abrahaame na7a Isma7eelako bidi, iya na7iw Mahlaato, Nebayoota michiw, ba macheta bolla gujidi ekis.

10 Yayqoobi Barsaabepe Kaarane baanaw keyis. 11 I, issi bessi gakiya wode awi wullin, qamma yan aqis. He bessan de7iya shuchatape issuwa borkotidi he bessan dhiskis. 12 I amuho amuhidi kodo issoy sa7an eqin xeeray salo gakidaysanne, Xoossa kiitanchoti iya bollara pude keyeysatanne duge wodheyisata be7is. 13 He koduwas xeeran Goday eqidi, “Taani Godaa, ne aawa Abrahaame Xoossa, Yisaaqa Xoossa, ha neeni zin7ida biitta newunne ne sheeshas immana. 14 Ne sheesha sa7a shafeda darsana. Neeni doloha bagga, wuloha bagga, pudeha bagganne dugeha bagga dalgana. Biitta bolla de7iya asa ubbay ne baggaranne ne sheesha baggara anjetana. 15 Taani neera de7ayis. Neeni biya bessa ubban taani nena naagana. Taani nena ha biitta guye zaarada ehana. Taani new oothana gidaysa polana, nena aggike” yaagis.

16 Yayqoobi dhiskofe barkidi, “Ta erabikefe attishin, tuma Goday ha bessan de7ees” yaagis. 17 I babidi, “Ha bessay waani yashshi! Ha bessay Xoossa keethife attishin, haraso gidenna. Haysi salo penge” yaagis.

18 Wontetha gallas wonta guura Yayqoobi dendidi, Xoossas dummayanaw ba borkotida shucha ekidi tuussatho essidi iya bolla zayte tigis. 19 Yayqoobi he bessa Beetele (Xoossa keethi) gidi xeegis. Shin he katamay hessafe kase Looza geetetees.

20 Yayqoobi, “Ta biya ogiyan ne tana naagiko, taw kathinne ma7o immiko, 21 ne tana ta aawa soo saro zaariko, ne ta Xoossa gidana. 22 Taani dummayanaw tuussatho essida ha shuchay Xoossa keetha gidana. Tuma neeni taw immiyaba ubbaafe tammaafe issuwa new immana” yaagidi Xoossas caaqis.