Inbaqoome Maxaafa
Gaatha Qofa
Ha maxaafan, koyro nam7u shempotan, Inbaqoomey Godaara palamiya palama be7oos. Inbaqoomey, Yihudan de7iya nagaranne eeqa goyinnuwa be7idi, “Xoossay geella gidida ba deriya be7ishe ayis pirdona aggidi aadhii?” yaagidi oychin, Xoossay, mata wode Yihuda pirdanaw Babiloone miishe oothidi go7etanaw de7eysa Inbaqoomes odis. Kaallidi Inbaqoomey, “Xoossi Yihuda pirdanaw waatidi nagaranchonne wozana mino gidida Babiloone miishe oothidi go7etii?” yaagidi oychis. Xoossi zaarishe, Babiloonetika mata wode pirdetonna attonaysa Inbaqoomes odis.
Inbaqoomey maxaafan wursetha shempoy Inbaqoomey, Godaa, iya wolqaasinne iya bonchuwas galatishe woossiya woosa oykis. Inbaqoomey, Ermiyaasinne Hizqeeli de7ida woden doonna aggenna.
Maxaafa Ayfe Qofata
Inbaqoome oyshanne Godaa zaaruwa (1:1—2:20)
Inbaqoome woosa (3:1-19)
1
Inbaqoome Koyro Mootuwa
1 Nabiya Inbaqoomes Goday qoncisida qaalay haysa. 2 Inbaqoomey, “Abeeti Godaw, tana maaddana mela taani nena xeegiya wode awude gakanaw si7onna ixay? Taani un7etada neeko waassiya wode awude gakanaw ashshona ixay? 3 Neeni ha iitatetha ubbaa tana ayis bessay? Neeni bala be7ashe ayis si77i gay? Dhayoynne geellatethi ta sinthana; palaminne ooshshi biitta ubban daris. 4 Hessa gisho, higgey dol7is; suure pirdi kanthenna. Nagaranchoti xillo asata teqidi oykida gisho, pirdi geellatis” yaagis.
Godaa Zaaruwa
5 Goday zaaridi, “Hinte yuushuwan de7iya kawotethata xeellidi malaaletite. Hintew asi odin hinte ammanonna oosuwa taani hinte wodiyan oothana. 6 Taani qadhey baynaysatanne dirgiya Babiloone asaa denthana. Enti bantaba gidonna biitta olidi oykanaw biitta ubban yuuyosona. 7 Enti yashisoosonanne daganthoosona; bantana bonchisiya higge kessoosona. 8 Enta parati maahepe aadhidi ellesoosona; koshatida omarsa suudhumepe aadhidi wozana mino. Enta para asati haahope yoosona; enti arganthi issiba oykanaw wodhiyada paalloosona. 9 Enta olanchoti ubbay iita ooso oothanaw bazzo carkoda carkishe yoosona. Asa di77idi shafeda shiishosona. 10 Enti kawota bolla qelqisoosona; haareyisata enti toochoosona. Enti shucha dirsan diretida katamata ubbaa bolla miicoosona. He dirsata di77anaw enta yuushuwan biitta shiishosona. 11 Hessafe guye, enti ubbaa carko mela pitidi efana. He geellatas enta wolqay enta xoossaa” yaagis.
Inbaqoome Nam7antho Mootuwa
12 Abeeti Godaw, ta Xoossaw, ta Geeshshaw, neeni merinaa Xoossaa gidikii? Neeni nu Zaalla gidiya gisho nuuni hayqoko. Abeeti Godaw, Babiloone asay nuna pirdana mela enta denthada wolqaa entaw immadasa. 13 Ne ayfeti daro geeshshi gidiya gisho, iitabaa xeellanaw dosokona; neeni iitabay oosetiya wode be7ashe si77i gaaka. Yaatin, ha iitata ayis si77i gada xeellay? Nagaranchoti bantafe aadhidi xilliya asata mittiya wode ayis si77i gay? 14 Neeni ase abba molodanne kaalethey bayna ulora gooshetiya medhetethata medhadasa. 15 Babiloone asay asa ubbaa qaphen qoridi kessana; enta banta gitiyan oykana; enta banta daachuwan buuridi shiishana; hessa oothidi enti ufaytananne hashshu gaana. 16 Hessa gisho, enti banta gitiyaas yarshana; banta daachuwas ixaane cuyisana. Enti shalo demmeynne injetin de7ey he gitetana. 17 Yaatin, enti banta gitiya qadhey bayna yeggishenne mishi kawotethata dhaysishe waanidi daanee?