1 Daro asa suuthi gussida Nanawe katamaa ayye! Wordoy kumis; bonqi ekida shaluwas tayboy baawa. 2 Nanawe katamen lisso girsay, gerto gondorsay, parata adarsoynne para gaareta gufay si7etees. 3 Para asati piirixoosona; mashshay locees; tooray phoolees. Daro asi hayqis! Ahi aha bolla dooretis; hayqidabaas tayboy baawa! Yaara kanthidi biya asi ahan dhubetees. 4 Hessi ubbay haniday maari bayna Nanawe laymatetha gaasuwana. I daro murunno oothasu; kawotethata ba laymatethan, asaa ba murunnuwan aylleyasu.

5 Ubbaafe Wolqaama Goday, “Heko, taani ne bolla dendas! Taani ne ma7uwa neepe qaarana; ne kalluwa asaa, ne pokuwa kawotethata bessaana. 6 Taani nena pito yeggiya bessi kessana; nena kadhana; asi ubbay nena miiccanaada oothana. 7 Nena be7iya ubbay neepe haakidi, ‘Heko, Nanawe katamay baysatis; iyaw azzananay oonee? Iya minthethiya asi awupe bentandesha?’ yaagana” yaagees.

8 Neno, Nanawe, neeni Gibxen de7iya Tebiso katamape aadhay? Iya Nayle shaafa matan de7awusu; haathi I yuushuwa teqis; shaafay iw miixa gidis; qassi haathayka iw dirsi. 9 Topheynne Gibxey iw zawi bayna wolqa; Puuxinne Liibey iyo maaddeyisata. 10 Gidoshin, iya di7etasu; I guutha nayti deshetidi, oge gaxa ubban kundidosona. I bonchetida asata bolla saami yegetis; I gita asati ubbay santhalaatan qashetidosona.

11 Neno, Nanawe, neeni mathotidi gandigariya asada hanana. Ne morketa sinthafe baqatada attiya bessi koyana. 12 Ne miixati ubbay koyro teerida ayfey de7iya balase mithaa mela. Balase mithaa qaathiya wode teeray meysa doonan wodhees. 13 Heko, ne olanchoti ubbay maccasa mela. Ne zawa pengeti ne morketas dalgidi dooyetidosona; kobe mithaa tami mis. 14 Ne morketi ne yuushuwa un7ethiya wode uyana haatha ha77i tika. Ne miixa mintha; urqa yedhada xuube medha; oto giigisa. 15 Nena yan tami maana; booley kathi meysada nena mashshi maana. Neeni booleda dara gondoda yeleta. 16 Neeni ne zal7anchota salo xoolintotape aathada darsadasa. Shin enti booleda ubbaa mi diggidi paallidi dhayana. 17 Ne toora moconatinne ne moorinnati meego wode dirsa bolla uttida boole mela. Enti awi keyiya wode paallidi dhayoosona; enti de7iya bessaa erey baawa.

18 Neno Asoore kawaw, ne halaqati dhiskidosona; ne bonchetida asati kundidosona. Ne asay dereta bolla laaletis; enta shiishiya asika baawa. 19 Neeni zawi bayna iitatethaafe kessi ekida asi bayna gisho, ne me7oy kooletenna; ne madunthay paxenna. Nebaa si7ida ubbay ne bolla kushe baqana.