1 Neno, Nanawe, mentheretheysi keyis! Hessa gisho, ne miixa naaga; ne ogiya wocha; ne dancuwa mintha; nena giigisa.

2 Bonqeysati bonqidi, enta woyniya dhaysikoka, Goday Isra7eele bonchuwa zaaridaysada Yayqooba bonchuwa zaarana.

3 Olanchoti zo7o gondalle oykidosona; zo7o ma7o ma77idosona. Enti olas giigiya wode para gaareti qin7aarosona; enti banta toora luuxoosona. 4 Para gaareti ogiyan adarsoosona; enti yaanne haanne hemetishe katamaa ogiyan yuuyosona. Qassi enti lacoy loccu giya xompe daanosona; wol7anthada ellesoosona. 5 Nanawey ba halaqata xeegidi shiishana, shin enti yishe oge bolla dhubetana. Enti katamaa gimbe dirsaako ellesana, morketa qohuwape enta naagiya gondalley giigis. 6 Shaafa baggara de7iya katamaa dirsaa pengeti dooyetidosona; kawo gadhoy dagammis. 7 Kawiya di7etada basu; I macca aylleti azzanidi holleda guugumana; banta tiraa baqishe yeekana. 8 Teqetida haathi dooyi bessin goggeysada Nanawe asay katamaape baqatana. Asi enta ba qaala dhoqu oothidi, “Eqite! Eqite!” yaagidi xeegana, shin oonika guye xeellenna. 9 He katamaa shaluwasinne, iyan minjetida boncho miishiyas tayboy baawa. Hessa gisho, he biraanne worqaa bonqite!

10 Nanawey baysa gidis; kasatidi, bazo gidis! Asaa wozanay yashshan til7is; gaadey kokoris; xeessay xaaxetis; som7oy bullatis! 11 Gaammoti aqiya bessay, wodala gaammoti de7iya bessay, addeynne macca gaammoti banta maratara yashshi bayna gupiya bessi daaniya Nanawe katamay ha77i awun de7ii? 12 Gaammoy ba maratas gidiyaba oykis; baara de7iya macca gaammes mentherethidi immis. Ba gongoluwa wodhethan, ba ollaa ashon kunthis.

13 Ubbaafe Wolqaama Goday, “Heko, taani ne bolla dendas! Taani ne para gaareta taman xuuggana; ne wodala gaammota mashshi maana. Neeni haratape ekidaba taani neepe wosisana; ne kiitanchota qaalay hizape si7etenna” yaagees.