3
Inbaqoome Woosa
1 Mazmuren shiqida nabiya Inbaqoome woosay haysa:
2 Abeeti Godaw, neeni kase oothidaba taani si7ada yayyas.
Godaw, nu wodiyanka he oosota zaarada ootha;
enti nu wodiyanka ereto.
Ne hanqetiya wode ne maarota qopa.
3 Xoossay Temaana biittafe yees;
Geeshshay Paarana deriyape wodhees.
Iya bonchoy saluwa kammis;
iya galatay sa7aa kumis.
4 Iya poo7oy phooliya awa mela;
iya wolqay qosetidi uttida iya kushiyape
xolqiya poo7oy keyees.
5 Gadoy iya sinthan bees;
tama lacoy iya tohuwape keyees.
6 I eqin biittay qaaxis;
I xeellin kawotethati kokoridosona.
Merinaa dereti woddidosona;
I enta bolla hemetiya benipe de7iya zumati laaletidosona.
7 Taani Tophe asaa dunkaaney metootishin be7as;
Midiyaame biitta asay kokorishin be7as.
8 Abeeti Godaw, neeni ayis hanqetadii?
Shaafati nena hanqethidona?
Woyko ne hanqoy abba bollee?
Akay, neeni ne paratanne ne para gaareta toggiday
ne asaas xoono immanaasa gidennee?
9 Neeni ne dongiya waaxadasa;
dukanaw giigisadasa;
biitta phalqada haathe kessadasa.
Salaha
10 Dereti nena be7idi yashshan kokoridosona;
kixa haathay aadhis.
Ciimmo haathati waassidosona;
banta zuliya dhoqu dhoqu oothosona.
11 Ne dongiya dukan, ne toora phoolethan,
awinne ageeni banta de7iya bessan eqidosona.
12 Neeni hanquwan biitta ubba yuuyadasa;
kawotethata ne hanquwan yedhadasa.
13 Ne asaanne ne tiyidaysa ashshanaw keyadasa;
iitata halaqaa shocadasa;
iya ma7uwa qaarada kallo ashshadasa.
Salaha
14 Nuna laallanaw goteda yida nu morkiya,
metootanchota mittanaw geeman qosetidaysa,
iya tooran iya caddadasa.
15 Neeni ne paratara abba bolla hemetadasa;
daro haatha yedhadasa.
16 Taani hessa ubbaa si7in ta wozanay dagammis;
ta mettershay kokoris.
Ta meqethay dagammis;
ta tohoy gundis.
Nu morketa Goday seerana gakanaw,
taani metuwa gallasaa danda7an naagana.
17 Balase mithay ayfonna ixikoka,
woyniya bolla ayfey bentonna ixikoka,
shamahoy ayfonna ixikoka,
goshshan kathi kaxikoka,
girben dorsi dhaykoka,
zadalon mehey dhaykoka,
18 taani Godan ufaytana;
tana ashshiya Xoossan ufaysan kumana.
19 Ta wolqay Ubbaa Haariya Godaa;
I ta tohuwa gaara tohoda minthees;
I tana dhoqa bessan hemethees.