Sofonaasa Maxaafa
Gaatha Qofa
Sofonaasa maxaafay xaafetiday, Yihudinne Yerusalaamey Godaa gallasan yaanaw de7iya daganthiya pirdaba odanaasa. Maxaafay, asa koche ubba bolla Xoossa pirdi yaanaysi attonaba gidikoka (1:2; 3:8), ubbaafe aathidi I nagara gaason Yihuda bolla yaanaw de7iya pirda odees (1:4-18; 3:1-7). Hessa gisho, Xoossa pirda gallasay gakanaape sinthe asay banta nagara paaxidi, Xoosse koyana mela asaa denthethees (2:1-3).
Sofonaasi, ichashu allaga biittata bolla Xoossay pirdanaysa odees. Entika, Filisxeeme, Amoone, Moo7abe, Tophenne Asoore (2:4-15). Nabey Yerusalaame nagara odidaape guye, Xoossay ba asaa shiishanaysa, wozanaysanne zaaridi oorathanaysa odees (3:9-20). “Hinteno, biittan de7iya ashketo, iya kiita naagiya ubbato, Godaa koyte; xillotethi koyte; ashketethi koyte. Ooni eri Godaa hanqo gallas hinte attona aggeketa” yaagis.
Maxaafa Ayfe Qofata
Godaa gallasan Yihudinne Isra7eeley pirdetana (1:1-18)
Xoossako simo (2:1-3)
Hara kawotethata bolla yaana pirda (2:4-15)
Yihudinne hara kawotethati Godaako simmana (3:1-20)
1
Godaa Pirda Gallasa
1 Amoone na7ay Iyosyaasi Yihudan kawotida wode Sofoniyaasako yida Godaa qaalay haysa. Sofoniyaasi Kuusha na7aa; Kuushi Gadalla na7a; Gadalli Amaare na7a; Amaarey Hizqiyaasa na7aa. 2 “Taani biitta bolla de7iyaba ubbaa dhaysana. 3 Asenne mehee, salo kafotanne abba molota dhaysana. Iita asata shira yeggana; asa zare biitta bollafe dhaysana” yaagees Goday.
Yihuda Bolla Yaana pirda
4 “Yihudaninne Yerusalaamen de7iya ubbaa seeranaw ta kushiya denthana. Ba7aale eeqa goyinneysatanne iya haggaaziya kahineta he bessaafe dhaysana. 5 Keetha bolla keyidi awas, ageenasinne xoolintotas goyinneyisata taani dhaysana. Godaa goyinnishenne iya sunthan caaqishe Moloka geetetiya eeqa sunthan caaqeyisata taani dhaysana. 6 Tana kaalo aggidi guye simmidaysata, tana koyboonaysatanne tana oychiboonayisata taani dhaysana” yaagees Goday.
7 Godaa gallasay matida gisho, Ubbaa Haariya Godaa sinthan si77i giite! Goday yarshuwa giigisis; qassi ba xeegida imathata geeshshis.
8 “Godaa yarshuwa gallas halaqata, kawa naytanne allaga biitta ma7o ma77ida ubbaa taani seerana. 9 He gallas allaga biitta asatada, eeqa goyinneysatanne banta godaa keethaa geellatethaninne cimon kuntheyisata taani seerana” yaagees Goday.
10 “He gallas Molo Pengiya baggara waasoy, katamaas nam7antho shaahuwan yeehonne zumata bolla gita dom7e girsi si7etana. 11 Hinteno, katamaas garsa baggan de7eysato, yeekite. Yan zal7iya ubbay dhayidosona; bira oykidaysati hayqi wuridosona. 12 He gallas taani xompe oythada Yerusalaame gidduwa koyana. Hirgi bayna wodhi uttidi banta wozanan, ‘Goday lo77oka iitaka’ geyisata taani seerana. 13 Enta shaloy bonqetana; enta keethay laaletana. Enti keethe keexana, shin he keethan dookona; woyne tokana, shin he woyniya uyokona” yaagees Goday.
Godaa Gita Gallasa
14 “Godaa gita gallasay matis;
ellesidi gakis.
Godaa gallasay camo gallas;
He gallas mino olanchotika waaso goochana.
15 He gallasay hanqo gallas,
he gallasay metonne un7a gallas,
dhayonne laaletetha gallas,
dhumanne caagana gallas,
shaaranne sakana dhuma gallas gidana.
16 He gallasay diretida katamata bolla,
adussa gimbeta bolla ola moyzey punetana;
giigeta giya waasoy si7etana.
17 Enti tana qohida gisho,
qooqeda tattafana gakanaw, enta bolla meto ehana.
Enta suuthay di7oda goggana;
enta ahay pitoda yegetana.
18 Godaa hanqo gallas
enta biraynne enta worqay enta ashshena.
I sa7an de7iya ubbaa qoponna dhaysana;
biitta ubbay iya hanquwa taman meetetana” yaagees Goday.