1 Hinteno, yeelli bayna asaw, ane issife shiiqite! 2 Carkoy punnidi efiya baanada hanonna de7ishin, yashshiya Godaa hanqoy hinte bolla wodhonna de7ishin, Godaa hanqo suulaa gallasay hinte bolla yoonna de7ishin Godaako simmite. 3 Hinteno, biittan de7iya ashketo, iya kiita naagiya ubbato, Godaa koyte; xillotethaa koyte; ashketethi koyte. Ooni eri Godaa hanqo gallas hinte attonna aggeketa.

4 Gaaza katamay ona gidana; Asqaloona katamay baysa gidana. Ashdooda katama asay seeta gallas goodettana; Eqroona katamay shodetana. 5 Hinteno, abba gaxan de7iya Keltaaweto, hintena ayye! Neno, Filisxeemeti de7iya Kanaane biittaw, Godaa pirday ne bolla yees. Taani nena dhaysana; issi asika attenna. 6 Abbaa gaxan de7iya hinte biittay mehe heemetiya bessi, henthanchoti de7iya bessinne mehe dara gidana. 7 Yihuda asape attidaysati abba gaxan de7iya bessaa laattana; enti yan heemmana. Sa7ay qammiya wode enti Asqaloona kataman de7iya keethatan aqana. Goday enta Xoossay entaba qopana; I enta zaaridi naannisana.

8 Ubbaafe Wolqaama Goday, Isra7eele Xoossay, “Taani Moo7abe tooshiyanne Amoone cashshaa si7as. Enti ta asaa waatidi toochidaakonne enta biitta ekanaw waatidi mandidaako ta erayis. 9 Hessa gisho, ta de7o sunthan caaqayis; Moo7abey Sodoomeda hanana; Amooney Gamoorada hanana. Enti merinaw maxine ollanne agunthi ma77ida bazzo gidana. Ta asape attidaysati enta shaluwa bonqana; enta biitta laattana” yaagees.

10 Enti Ubbaafe Wolqaama Godaa asaa toochida gishonne cayida gisho, enta bolla metoy gakana. 11 Enta biittan de7iya xoossata I dhaysiya wode Goday entana yashisana. Sa7an de7iya kawotethatan de7iya asa ubbay ba de7iya bessan iya goyinnana.

12 Hinteno, Tophe asaw, hinte ta mashshan hayqana.

13 I ba kushiya pudeha bagga yeddidi Asoore biitta dhaysana. Qassi Nanawe katamaa mela bazzoda baysa bessi oothana. 14 Mehe wudeynne biittan de7iya do7ati ubbay yan hemetana; guttoynne quxarey laaletida gimbiya giddon daana. Enta qaalay maskooteranne pengiyara si7etana; ziga tuuqeti kallotana. 15 “Taape attishin, hari baawa” yaagidi otortidi de7ida katamay ha77i waanidi do7ati aqiya bessi gididee? Iya matara aadhiya ubbay banta kushiya baqishe, “Poora!” gaana.