1 Makallanchuwas, tunidaysasinne ba deriya un7ethida Yerusalaame katamaa ayye! 2 I oonaka kiitetenna; seerin simmenna; Godan ammanetena; ba Xoossaako shiiqenna. 3 Iya halaqati gudiya gaammo mela; iya daynnati demmidaba wontos ashshona ubbaa midi ongiya omarsa suudhume mela. 4 Iya nabeti otoranchonne genancho; iya kahineti geeshshaa tuniseyisata; enti Godaa higgiya mirqoosona. 5 Shin iya giddon de7iya Goday xillo; I bala oothenna. Wonta wonta I xillo pirdees; gallas gallas hessa aggenna. Gidoshin, yan de7iya geellay yeella erenna.

6 “Taani kawotethata dhaysas; enta gimbeta laallas. Enta katamata issi doonna baysa biitta oothas; enta ogeta asi kanthonna bazzo oothas. 7 Taani haysa ubbaa oothada, ‘Ta asay tana bonchana; ta seera ekana; ta kiittidaba dogenna’ yaagas. Shin enti kasepe aadhidi iitidosona; banta oosuwan tunidosona” yaagees Goday.

8 “Ane taani pirdiya gallasay gakanaw guuthu naagite. Taani deretanne kawotethata shiishanaw qofa qachas; ta hanquwa suulaa enta bolla gussana; biittay kumethi ta hanquwa taman xuugetana.

9 “He wode asa ubbay geeshsha oda odetana mela oothana. Enti ubbay Godaa sunthaa xeegana; issife iyaw goyinnana. 10 Laaletida asay, tana tuma goyinneysati, Tophe shaafatape hefinthan de7eysati taw imota ehana. 11 Otoreysatanne ceeqeteyisata ta hinte giddofe dhaysiya gisho, he wode hinte ta bolla oothida oosuwa gaason yeellateketa. Hizape guye hinte ta geeshsha zumaa bolla otorteketa. 12 Taani hinte giddofe bantana kawusheysatanne aadata ashshana; enti Godaa sunthan ammanetana. 13 Isra7eele asaape attidaysati iitabaa oothokona; wordo odetokona; enta inxarsan cimoy bentenna. Hessa gisho, enti midi kallidi saron daana; enta yashisiyabay baawa” yaagees.