Hagge Maxaafa
Gaatha Qofa
Hagge maxaafay xaafetiday K.Y.S. 520 laytha heerana. Yihuda asay di7ope simmidi Yerusalaamen duussu doomin, guutha laythi aadhidaba gidikoka, buroo xoossa keethay laaletida mela de7ishina. Hessa gisho, ha maxaafa kiitay asaa kaaletheysati, xoossaa keetha keexana mela enta denthethanaasa.
Hagge maxaafay oyddu kiitata oykis. Issi kiitay “Godaa qaalay” Hagge baggara yaagidi qoncis gidi odees (1:1; 2:1; 2:10; 2:20).
1. Di7ope simmida koyro asay xoossa keethay laaletidi de7ishin, enti lo7o keethan de7eysa boris (1:4). Enta hanotape dendoysan Xoossay enta anjuwa teqidaysanne (1:9-11); asay banta hanota guye simmidi xeellana mela enta zoris (1:5, 7).
2. Koyro xoossa keetha bonchuwa be7ida asay haniyaba be7idi ufaysi qanxidosona (2:3).
3. Asay geeshshatethan Xoossas kiitetana mela zorees (2:10-19).
4. Zarubaabelas imetida ufaysa qaala odees (2:20-23).
Wursethan, asay ooraxikonne geeshshatethan de7iko, Xoossay entaw saronne duretethi immanaw de7eysa odidi kuuyees.
Maxaafa Ayfe Qofata
Xoossa keethay keexeto (1:1-15)
Gita boncho ufaysa qaala (2:1-9)
Anjosinne geeshshatethas xeegetethi (2:10-19)
Zarubaabelas imetida ufaysa qaala (2:20-23)
1
Xoossa Keethay Keexetana Mela Imetida Kiita
1 Kawoy Daariyosi kawotida nam7antho laythan, usupuntho ageenan koyro gallasan, Godaa qaalay nabiya Hagge baggara Yihuda biitta haariya Salatiyaala na7aa, Zarubaabelakonne kahine halaqa gidida Iyyosadeqa na7aa, Iyyasuko haysada yaagidi yis. 2 Ubbaafe Wolqaama Goday, “Ha asay Godaa keethaa zaaridi keexiya wodey buroo gakibeenna” yaagees.
3 Yaatin, Godaa qaalay nabiya Hagge baggara haysada yaagis: 4 “Ta asaw, ta keethay laaletidi uttin, hinte, hinte alleeqetida keethatan daanaw haysi hintew wodee?” yaagis.
5 Hessa gisho, Ubbaafe Wolqaama Goday, “Ane hinte hintena gakishe de7iyaba qopite. 6 Hinte daro zerideta, shin guuthu shiishideta. Meeta, shin kalleketa; uyeeta, shin aleketa. Ma77eeta, shin hintena ho77enna. Damooze ekeeta, shin peedhetha kiisen yeggiyada coo dhayees” yaagees.
7 Ubbaafe Wolqaama Goday, “Ane hinte hintena gakishe de7iyaba qopite. 8 Hiza deriya bolla keyidi, mithi qanxidi ehite; taani iyan ufaytana melanne bonchetana mela xoossa keethaa zaaridi keexite. 9 Hinte daro kathi shiishanaw qopideta, shin guutha gidis. Iya hinte soo gelsiya wode ta punnin dhayi aggis. Haysi aybis hanidee? Taani haysa oothiday hinte ubbay hinte keethaa keethaa keexishin, ta keethay laaletidi attida gishosa. 10 Hessa gisho, saloy ira diggis, sa7i kathi immonna ixis. 11 Taani biittanne zumaa bolla, kathaa bolla, woyniyanne zaytiya bolla, biitti dolisiyaba ubbaa bolla, asaanne mehiya bollanne hinte daabura ubbaa bolla koshaa xeegas” yaagees. 12 Haysafe guye, Salatiyaala na7ay Zarubaabeli, kahine halaqa gidida Iyyosadeqa na7ay, Iyyasuynne di7etethaafe simmida asa ubbay, Godaa banta Xoossaa qaalasinne Goday enta Xoossay kiitida nabiya Hagge qaalas, kiitetidosona; asay Godaa yayyidosona. 13 Yaatin, Goday kiitida Haggey asaako, “ ‘Taani hintera de7ayis’ yaagees” yaagidi Godaa kiitaa asaas odis. 14 Yaatin, Goday, Yihuda biitta haariya Salatiyaala na7aa, Zarubaabela, Kahine halaqa gidida Iyyosadeqa na7aa, Iyyasunne di7etethaafe simmida asa ubbaa denthethis. Enti Ubbaafe Wolqaama Godaa, banta Xoossaa keethaa keexo doomidosona. 15 Haysi haniday kawoy Daariyosi kawotida nam7antho laythan, usupuntho ageenan laatamanne oyddantho gallasaana.