1 Daariyosi kawotida nam7antho laythan, laapuntha ageenan laatamanne issintho gallasan, Godaa qaalay nabiya Hagge baggara haysada yaagis. 2 “Yihuda haariya, Salatiyaala na7aa, Zarubaabelas, kahine halaqa gidida Iyyosadeqa na7aa, Iyyasusinne di7etethaafe simmida asaas haysada yaagada oda: 3 Ha xoossa keetha kase bonchoy ay meleko be7ida asaape hinte giddon attida asi de7ii? Hachi hinte be7iya wode ay daanii? Hinte ayfiya sinthan baynaba daanennee? 4 Gidoshin, Zarubaabela, ha77i minna! Kahine halaqa gidida Iyyosadeqa na7aw, Iyyasu minna! Biittan de7iya asaw hinte minnidi oothite! Taani hintera de7ayis. Taani Ubbaafe Wolqaama Goday haysa odayis. 5 Hinte Gibxefe keyiya wode taani hintera gidana gada caaqidaysada ta Ayyaanay hintera de7iya gisho yayyofite!” yaagis.

6 Ubbaafe Wolqaama Goday, “Taani qantha woden issi toho gujada salotanne sa7aa, abbanne biitta qaathana. 7 Kawotethata ubbaa qaathada kawotethata ubban de7iya shaloy haa yaana mela oothana. Ha xoossa keetha bonchon kunthana. 8 Biray tabaa; worqay tabaa. 9 Koyro bonchuwafe ha nam7antho xoossa keetha bonchoy aadhana. Taani Ubbaafe Wolqaama Goday ha bessan sarotethi immana yaagada oda” yaagis.

10 Daariyosi kawotida nam7antho laythan, uddufuntho ageenan laatamanne oyddantho gallasan, Godaa qaalay nabiya Hagge baggara haysada yaagidi yis. 11 Ubbaafe Wolqaama Goday, “Higgey woygiyako eranaw kahineta oycha. 12 ‘Issi asi geeshsha ashuwa ba afilaa macaran qachidi eki bishin, he afilaa macaray, uytha woyko woxiya woyko woyniyanne zaytiya woyko hara ay qommo kathi bochiko, he boshetida kathay geeshshi gidanaw danda7ii?’ yaagada oycha” yaagis.

Kahiney zaaridi, “Geeshshi gidanaw danda7enna” yaagis.

13 Haggey zaaridi, “Aha bochidi tunida issi asi haysatape issi qommo kathaa bochiko he kathay tuna gidanee?” yaagidi oychis.

Kahiney, “Ee tunana” yaagidi zaaris.

14 Haggey zaaridi, “Ha asaynne ha kawotethay ta sinthan hessa mela. Enti oothiya oosoynne enti immiya imotay ubbay hessa mela tuna” yaagees Goday. 15 “Hachife doomidi, hinte bolla gakidaba akeekite! Godaa keethaa keexo doomanaape kase, 16 hinte nam7u kuntaale kathi ekana gidi, kathi wothida bessaa bideta, shin issi kuntaale xalaala demmideta. Issi xeetu litiro woyne ekanaw woyne gum7iya ollaa bideta, shin hinte oytamu litiro xalaala woyne demmideta. 17 Taani hinte kushe ooso ubbaa bolla melsiya carko, katha hargenne shachi yeddada dhaysas. Shin hinte ha ubban taako simmibeketa” yaagees Goday.

18 “Hachi gallasaape, ha uddufuntho ageenan laatamanne oyddantho gallasaape doomidi ane akeekite. Godaa keethaa baasoy baasetida gallasaape doomidi qopite. 19 Ha77i zerethas haniya kathi hinte shaalen dhayiko, woyney, balasey, oromaaneynne shamahoy hachi gakanaw ayfonna ixikoka, hachife doomada taani hintena anjana” yaagees Goday.

20 He ageenan laatamanne oyddantho gallasan Godaa qaalay nam7antho Haggeko haysada yaagis. 21 Yihuda haariya Zarubaabelas haysada yaagada oda: “Taani salotanne sa7aa qaathana. 22 Kawotethata araata shira yeggana; enta wolqaa dhaysana. Para gaareta enta laaggeysatara shira yeggana; enta parati wurana; para asati wolu wodhana. 23 ‘Ta aylliyaw, Salatiyaala na7a Zarubaabela, taani Ubbaafe Wolqaama Goday nena he gallas ekana. Taani nena ta migiddo maatame mela oothana. Taani nena dooras’ yaagees” yaagada oda.