Ibraawe Asaas
Xaafetida Kiita
Gaatha Qofa
Ha kiitay xaafetiday, wolqaama metoy gakin, banta ammanuwa agganaw matida ammaniya asaasa. Ha maxaafa xaafey, Yesuus Kiristoosi wursethinne tuma Xoossa qoncethi gideysa Ibraawe asaas bessees. Ammaniya asay banta ammanuwan minnana mela enta minthethees. I hessan heedzu ayfe qofata qoncisidi bessees.
1. Yesuusi ba ekida metuwan Aawas tuma kiitetida merina Xoossa Na7a. I Xoossa Na7a gidida gisho, Gal7a Caaquwa wode de7iya nabetape, kiitanchotapenne Musepe bolla.
2. Yesuusi Gal7a Caaquwa kahinetape daro aadhiya merina kahine gideysa Xoossay ba huuphen markatis.
3. Yesuusa baggara ammaniya asi nagarape, yashafenne hayqope attees. Yesuusi kahine halaqa gideysada, kase Ibraaweta ammano woganinne mehe yarshon kuyada bentiya atotetha oosuwa ha77i tuma oothis.
Xaafey Isra7eele asa taariken daro eretida asaa ammano leemiso oothi ekidi (Shem 11) ha maxaafa nabbabiya asay banta ammanuwan minnana mela akeekisees. Hessadaka, shempo 12 nabbabiya asay banta ayfiya Yesuusa bolla wothidi, banta ammanuwan minnana melanne ay metoynne waayey gakikoka, gencana mela zorees. Wursethan zoreninne akeekiso qaalan ba kiita kuuyees.
Maxaafa Ayfe Qofata
Xoossay Kiristoosa baggara qoncis (1:1-4)
Kiristoosi kiitanchotape bolla (1:4—2:18)
Kiristoosi Musepenne Iyyasupe bolla (3:1—4:13)
Kiristoosa kahinetethay bolla (4:14—7:28)
Kiristoosa caaqoy bolla (8:1—9:22)
Kiristoosa yarshoy bolla (9:23—10:39)
Ammano bayratethi (11:1—12:29)
Xoosse ufaysiya de7o (13:1-19)
Akeekisonne zore (13:20-25)
1
Na7ay Kiitanchotape Bolla
1 Kase Xoossay, nu aawatas nabeta baggara dumma dumma ogen daro wode odis. 2 Shin ha wursetha wodiyan ubbaa iya laatisida qassi alame iya baggara medhida ba Na7aa baggara nuus odis. 3 Na7ay Xoossaa bonchuwa phoolethaanne kumetha Xoossa Xoossatetha ekidi, ba wolqaama qaalan ha alamiya katisidi oykis. Asaa enta nagaraape geeshidaape guye Ubbaafe Bolla Xoossaa ushacha baggan saluwan uttis.
4 Iyaw imetida sunthay kiitanchota sunthafe bolla gideysada I entafe bolla. 5 Hiza, Xoossay kiitanchotape oodeko,
“Neeni ta Na7a;
ta hachi new aawa gidas” gidee?
Woyko qassi oodeko,
“Taani iyaw aawa gidana;
ika taw na7a gidana” gidee?Maz 2:7; 2 Same 7:14; 1 Taari 17:13.
6 Qassi Xoossay ba bayra Na7aa ha alamiya kiittishe,
“Xoossaa kiitanchoti ubbay iyaw goyinno”
yaagis.Zaare 32:43. 7 Xoossay kiitanchotaba odishe,
“Xoossay ba Kiitanchota carko,
ba aylleta tama laco oothees”
yaagees.Maz 104:4. 8 Shin ba Na7aba odishe,
“Xoossaw, ne araatay merinaw de7ees.
Ne kawotethaa ne xillotethan aysaasa.Maz 45:6-7.
9 Neeni xillotethi dosadasa; iita ixadasa.
Xoossay, ne Goday, nena ne laggetape aathidi dooris,
ufaysa zayte*Ufaysa zayte: I kawotiya wode asay ufaysan ililidi iya kawotheysa bessees. nena tiyis”
yaagees. 10 Xoossay Zaaridi,
“Godaw, koyro neeni sa7a medhadasa;
saloti ne kushe ooso.Maz 102:25-27.
11 Hessati ubbay dhayana;
shin neeni daana.
Enti ubbay afilada wurana.
12 Neeni enta saleenada xaaxana;
qassi enti afilada laametana.
Shin neeni ubba wode nena;
ne laythayka wurenna”
yaagees. 13 Shin Xoossay kiitanchotape oodeko,
“Taani ne morketa ne tohoy
yedhiyaso oothana gakanaw,
haysan taape ushacha baggan utta” gidee?Maz 110:1.
14 Kiitanchoti ubbay atotethi demmanaw de7iya asata maaddanaw Xoossay kiitida ayyaanata gidokonaayee?