5
1 Issi issi kahine halaqi asaa giddofe dooretidi, Xoossara gathiyaban asaa gisho imotanne nagara yarsho yarshanaw shuumetees. 2 I ba huuphen daaburancho gidiya gisho, eronnaysatasinne baleysatas qadhetanaw danda7ees. 3 I ba nagara gishonne asa ubbaa nagara gisho yarsho yarshanaw bessey hessasa.Leewe 9:7.
4 Oonika ha bonchuwa baw ekanaw danda7enna, shin Aaroni kahine halaqa gidanaw xeegidaysada Xoossan xeegetanaw bessees.Kessa 28:1. 5 Hessadaka, Kiristoosi kahine halaqa gidiya bonchuwa baw ekibeenna. Shin Xoossay iya,
“Neeni ta Na7a;
hachi ta new Aawa gidas”
yaagees.Maz 2:7. 6 Qassi harason,
“Malkexaadeqi kahine gididaysada,
neeni merinaw kahine gidana”
yaagees.Maz 110:4.
7 Yesuusi ase gididi ha alamiyan de7iya wode bana hayqope ashshanaw danda7iya Xoossaa daro yeehoninne afuthan woossis. I, iya bonchidi kiitetida gisho Xoossay iya woosa si7is.Maato 26:36-46; Mar 14:32-42; Luqa 22:39-46. 8 Yesuusi Xoossaa Na7a gidikoka ba waayetida waayan kiitetethi tamaaris. 9 Hessanka, Yesuusi ba oosuwa polidaape guye baw kiitetiya ubbay merinaa atotetha demmana mela gaaso gidis. 10 Xoossay Malkexaadeqa shuumidaysada kahine halaqa oothidi iya shuumis.
Hinte Ammanuwan Daaburopite
11 Ha nu oda bolla guji odanabay darobay de7ees, shin hinte akeekay guutha gidiya gisho hintew odi gelsanaw waaysees. 12 Hinte hannoode astamaare gidanaw bessees, shin Xoossaa qaala koyro timirtiya hintena zaari tamaarsiya hara asi koshshees. Hinte mino kathi maanaw danda7onna gisho maathi koshshees.2 Qoro 3:2. 13 Maathi paahetiya oonika yooga na7a gidiya gisho, lo77onne iita shaaki erenna. 14 Shin mino kathi lo77onne iita shaaki eriya kahaama asaasa.