1 Koyro caaquwas Xoossaa goyinniya wogaynne sa7a Xoossa Keethay de7ees. 2 Dunkaaney eqis. Iyan xompe wothiya kocay, xarpheezaynne Godaa sinthan wothiya uythay de7ees; he bessay Geeshsha Bessaa geetetees.Kessa 26:1-30; 25:31-40. 3 Nam7antho magarajuwafe guye baggara de7iya bessay Ubbaafe Geeshsha Bessaa geetetees.Kessa 26:31-33. 4 Iya giddon ixaane cuyisiya worqa saaxineynne worqan meeshetida caaqo Taabotey de7ees. He caaqo Taabotiyan mannay de7iya worqa xaaroy, aacida Aarona xam7aynne Muse higgey xaafetida nam7u loche shuchati de7oosona.Kessa 30:1-6; 25:10-16; 16:33; Taybo 17:8-10; Kessa 25:16; Zaare 10:3-5. 5 He Taabotiyape bolla baggara atotetha kamaa banta qefiyan genthiya boncho kiruubeti de7oosona. Shin ha77i he ubbaa qoncisidi odanaw danda7oko.Kessa 25:18-22.

6 Ha ubbay haysada giigidaape guye, kahineti ubba wode banta oosuwa oothanaw dunkaaniyas koyro kifiliya geloosona.Taybo 18:2-6. 7 Shin kahine halaqaa xalaali dunkaaniyas nam7antho kifiliya laythafe issi toho gelees. I yaa gelishe ba nagaraa gishonne asay eronna oothida nagaraa gisho suutha yarsho ekonna gelenna.Leewe 16:2-34. 8 Koyro dunkaaney eqidi de7ishin, Ubbaafe Geeshsha Bessaa efiya ogey buroo dooyetiboonaysa Geeshsha Ayyaanay hessan erisees.

9 Hessi ha wodiyas leemiso; Xoossas imetiya imoynne yarshoy goyinniya uraa kaha geeshshanaw danda7onaysa haysi bessees. 10 Hessati muussaba, ushshabaanne dumma dumma meecha wogata odeyisata. Enti ooratha wogay yaana gakanaw oosetiya kare bagga wogata.

11 Shin Kiristoosi ha77i nu demmida lo77obatas kahine halaqa gididi yis. I gelida dunkaaney gitanne polo gididaysa. He dunkaaney asa kushen oosetibeenna qassi ha alamiyaba gidenna. 12 Kiristoosi Ubbaafe Geeshsha Bessaa geliya wode deesha suuthinne mari suuthi ekidi gelibeenna. Shin merinaa atotetha immanaw ba suuthaa ekidi zaarethonna ogen issi toho gelis. 13 Deesha suuthaynne korma suuthay, xuugetida ussa bidoy, tunida asaa bolla dharcetidi entana geeshshiyaba gidiko,Leewe 16:15-16; Taybo 19:9, 17-19. 14 merinaa Geeshsha Ayyaana baggara borey bayna yarsho oothidi, Xoossaas bana immida Kiristoosa suuthay, de7o Xoossaa goyinnana mela hayqo kaalethiya oosuwape nu kaha waati aathidi geeshshennee?

15 Hessa gisho, xeegetidaysati Xoossay immida merinaa laata ekana mela Kiristoosi ooratha caaquwas giddo gididi sigetheysa gidis. Hessi haniday asay koyro caaquwape garsan de7iya wode oothida nagaraape entana wozanaw I hayqidaysana.

16 Hiza, keekey de7iko, he keekida uraa hayqoy eretanaw koshshees. 17 Keekida uray hayqiko iya keekey minnees. Keekida uray hayqonna attiko iya keekey oothenna.

18 Hari attoshin, koyro caaqoyka suuthi bayna minnibeenna. 19 Musey higge kiita ubbaa asaas odidaape guye mara suuthinne deesha suuthi haathara walakidi, zo7o dorsa ikisenne hisoophe wurco ekidi, maxaafaa bollanne asaa bolla wurxis.Kessa 24:6-8. 20 Musey asaako, “Hinte naagana mela Xoossay kiitida suutha caaqoy haysa” yaagis. 21 Hessadaka, dunkaaniya bollanne oothiya miishe ubbaa bolla suuthaa wurxis.Leewe 8:15. 22 Tumaka higgey geysada guuthabatape attishin, ubbabay suuthan geeyees. Suuthi gukonnashin atotethi baawa.Leewe 17:11.

23 Saluwabaas leemiso gididaysati ubbay mehe yarshon geeyanaw koshshees. Shin salobati banta huuphen hessafe aadhiya yarshuwan geeyanaw koshshees.

24 Kiristoosi tuma Xoossa keethaas leemiso gidida, asa kushen oosetida Ubbaafe Geeshsha Bessaa gelibeenna. Shin I ha77i nu gisho, Xoossaa sinthan bentanaw saluwa gelis. 25 Kahine halaqay laythan laythan ba suuthi gidonnaysa ekidi, Ubbaafe Geeshsha Bessa gelees. Shin Kiristoosi daro toho bana yarshanaw salo gelibeenna. 26 Hessada hanidaba gidiyako, Kiristoosi alamey medhetoosape doomidi daro toho waayetanaw koshshees. Shin ha77i wodiya wursethan nagara digganaw bana yarshidi zaarethonna ogen issi toho bentis.

27 Asi ubbay issi toho hayqanaw hessafe guye pirdetanaw bessees. 28 Hessadaka, Kiristoosi daro asaa nagara digganaw issi toho yarshetis. Shin I nagara tookanaw gidonashin, bana naageysata ashshanaw nam7antho qoncana.Isa 53:12.