8
Yesuusi Nu Kahine Halaqa
1 Nuuni haasaya gitabay hessa. Saluwan Ubbaafe Bolla Xoossaa araatape ushacha baggan uttida haysa mela kahine halaqay nuus de7ees.Maz 110:1. 2 I asan gidonashin, Godan eqida tuma dunkaaniyan xoossa keethan oothees.
3 Kahine halaqa ubbay imonne yarsho yarshanaw shuumetees. Hessa gisho, ha kahiney yarshanaw issibay daanaw koshshees. 4 Higgey kiiteysada yarshiya kahineti de7iya gisho, Kiristoosi sa7an de7iyaba gidiyako I kahine gidenna. 5 Enti kahinetethan oothiya dunkaaney salon de7eysas leemisonne kuya. Musey dunkaaniya essiya wode Xoossay iyako, “Taani nena zumaa bolla bessida leemisuwa kaallada ootha” yaagis.Taybo 18:21. 6 Shin Yesuusi giddo gididi sigethiya caaqoy, koyro caaquwape aadheysada I ekida oosoy entaysafe aadhees. Hessi eqiday aadhiya caaqo qaalana.
7 Koyro caaquwan bali baynaba gidiyako nam7antho caaqo koshshenna. 8 Shin Goday enta boridi, haysada yaagis:
“Taani Isra7eele asaaranne Yihuda asaara
ooratha caaqo caaqiya wodey yaana.Ermi 31:31-34.
9 He caaqoy ta enta aawata Gibxe biittafe kushiya oykada,
goocha kessida wode entara caaqida caaquwa mela gidenna.
Enti ta caaquwan ammanetibona gisho,
taani enta yegga aggas yaagees Goday.
10 Shin hizape guye Isra7eele asaara
ta caaqana caaqoy haysa yaagees Goday.
Taani ta higgiya enta guuggiyan wothana;
enta wozanan xaafana.
Taani enta Xoossaa gidana;
entika ta ase gidana.
11 Entafe oonika ba shooruwa woyko ba ishaa,
‘Godaa era’ yaagidi tamaarsenna.
Enti guuthafe gita gakanaw
ubbay tana erana.
12 Taani enta naaquwa atto gaana;
enta nagaraa zaara qopike” yaagees.
13 Xoossay ha caaquwa “Oorathi” gidi xeegishe koyroysa gal7isis. Hiza, gal7aynne ceegay dhayiya wodey gakis.