7
Kahiniya Malkexaadeqa
1 Malkexaadeqey, Saleema Kawoy, Ubbaafe Bolla Xoossaa kahine. He Malkexaadeqi Abrahaamey kawota oli xoonidi simmishin iyara gahetidi iya anjis.Medhe 14:17-20. 2 Abrahaamey ba di77idaba ubbaafe iyaw asraata kessidi immis. Malkexaadeqa sunthay koyro “Xillotethaa kawa”, nam7antho, “Saleema kawo” birshethayka “Sarotethaa kawa” guussu. 3 Malkexaadeqas aayiya woyko aawu woyko kocha paydoy baawa. Iya yeletethaas doomethi woyko iya de7uwas wursethi baawa, shin Xoossaa Na7a daanidi merinaw kahine gidis.
4 Malkexaadeqi ay mela giteeko be7ite. Nu aawata mayzay, Abrahaamey, ba de77idabaape iyaw asraata immis. 5 Kahine gidiya Leewe kochay Isra7eele asape, hessika Abrahaame koche gidida banta ishatape asraata ekana mela higgey kiittees.Taybo 18:21. 6 Malkexaadeqi Leewe koche gidonna ixikoka Abrahaamepe asraata ekis; ufaysa qaali de7iya Abrahaame anjis. 7 Guuthay gitan anjeteysi palanthenna.
8 Issi baggara, asraata ekeysati hayqiya asata, shin hara baggara asraata ekeysi de7on de7ees yaagidi odetidaysa. 9 Hiza, asraata ekiya Leewey, Abrahaame baggara asraata immis gaanaw danda7etees. 10 Ayis giiko, Malkexaadeqi Abrahaamera gahetiya wode Leewey yeletiboonnaba gidikoka, ba mayza Abrahaame gulbatan de7ees.
11 Isra7eele asaas higgey Leewe kahinetetha baggara imetis. Ha Leewe kahinetethay polo gididaba gidiyako Aaronaysa mela gidonashin, Malkexaadeqa mela hara kahine shuumanaw ayis koshshidee? 12 Hiza, kahineti laametiya wode higgeyka qassi laametanaw bessees. 13 Ha nu iyabaa odiya uray hara koche; iya sheeshape oonika yarsho bessan kahinetethan oothibeenna. 14 Nu Goday Yihuda sheeshape yidaysi eretidaysa. Gidoshin, Musey kahineteba odishe Yihuda kochaaba aybaka odibeenna.
15 Malkexaadeqa mela hara kahiney yidaba gidiyako ha nu odiyabay aadhidi qoncana. 16 I kahine gididay dhayonna de7o wolqanaape attishin, ba mayzaa wogaaninne higgen gidenna. 17 Geeshsha Maxaafay,
“Malkexaadeqa kahinetetha mela,
neeni merinaw kahine”
yaagidi markatees.Maz 110:4. 18 Koyro higgey daaburanchonne maaddonnaba gidiya gisho shaaretis. 19 Muse higgey aybinka polo oothanaw danda7ibeenna. Shin nuuni iya baggara Xoossaako shiiqiya ubbaafe aadhiya ufaysa qaalay nuus imetis.
20 Kiristoosi kahine gidiya wode Xoossay caaqis, shin harati kahine gidida wode hessa mela caaqoy baawa. 21 Shin Yesuusi caaqon kahine gidis. Xoossay yaagidi caaqis;
“Goday caaqis; I ba qofaa laammenna;
‘Neeni merinaa kahine’ ”
yaagis.Maz 110:4. 22 Ha caaquwa gaason Yesuusi nuus ubbaafe aadhiya qaala caaquwas waase gidis.
23 Kahinetethan oothonna mela hayqoy enta diggida gisho koyro kahineta tayboy daro. 24 Shin Yesuusi merinaw de7iya gisho iya kahinetetha hari laattenna. 25 Hessa gisho, I ubba wode enta gisho gaannatanaw merinaw de7iya gisho Xoossaako iya baggara yeyisata polo ashshanaw danda7ees.
26 Hiza, nuus koshshiyaba immiya, geeshshay, boreynne tuni baynaysi, nagaranchotape shaaketidaysinne saluwape aadhidi dhoqida kahine halaqay nuus koshshees. 27 I hanko kahine halaqata mela koyro ba nagara gisho, kaallidi asaa nagaraa gisho gallas gallas yarsho yarshanaw koshshenna. I bana yarshida wode zaarethonna ogen issi toho bana yarshis.Leewe 9:7. 28 Muse higgey daaburancho asaa kahine halaqa oothidi shuumees. Shin higgiyafe guye yida caaqo qaalay merinaw polo gidida Xoossaa Na7aa shuumis.