13
Wursetha Zore
1 Ammaniya asada issoy issuwara polo siiqetite. 2 Imathe mokeysa dogopite. Issi issi asati hessada oothishe eronna kiitanchota mokidosona.Medhe 18:1-8; 19:1-3. 3 Qashon de7eyisata hinteka entara issife qashon de7iyada oothidi entana qopite. Waaye ekiya asaara issife hinteka waaye ekiyada oothidi entana qopite.
4 Ekoynne geloy asa ubbaa matan bonchetidaba gido. Qassi Xoossay laymateysatanne laammeyisata pirdanaw de7iya gisho azinaynne machiya issoy issuwas ammanetanaw bessees.
5 Miishe siiqope hintena naagite; hintew de7iyaban alite. Xoossay, “Taani nena ubbaraka yeggike woyko aggike” yaagis.Zaare 31:6, 8; Iyya 1:5. 6 Hessa gisho, nuuni ammanetidi,
“Goday tana maaddeysa;
ta yayyike; asi tana ay oothanee?”
yaagos.Maz 118:6.
7 Xoossaa qaala koyro hintew odida hintena kaaletheyisata qopite. Enti waanidi de7idaako enta duussaa be7idi enta ammanuwa kaallite.
8 Yesuus Kiristoosi zineka hachika merinawuka laametenna. 9 Dumma dumma ooratha timirten haraso bidi dhayopite; boopite. Nu wozanay Xoossaa aadho keehatethan minnanaw besseesipe attishin, min go77onna kathan wogaa polon gidopo.
10 Shin dunkaaniya giddon oothiya kahineti he yarsho kathaafe maanaw entaw maati bayna yarsho bessay nuus de7ees. 11 Kahine halaqay nagara yarshos mehe suuthi ekidi yarshanaw Ubbaafe Geeshsha Bessaa gelees. Shin he mehiya ashuwa dirsaafe karen xuuggees.Leewe 16:27. 12 Hessadaka, Yesuusi deriya nagaraape ba suuthan geeshshanaw katamaa pengiyafe karen waayetis. 13 Hiza, nuuni boriya tookidi dirsaafe kare iyako keyoos. 14 Hiza, nuus haysan merinaw de7iya katami baawa, shin nuuni yaana katamaa naagoos.
15 Hiza, Yesuusa baggara ubba wode iya sunthaas markatiya mettersha galata yarsho Xoossaas immoos. 16 Lo77oba oosonne hintew de7iyabaape metootida asaas imo dogopite. Hiza, hessa mela yarshoy Xoossaa ufaysees.
17 Hintena kaaletheysatas kiitetite; enti giyaba oothite. Enti banta oothiyabas Xoossaa sinthan oyshetanaw de7iya gisho, hintena heemmoosona. Hinte entaw kiitetiko, banta oosuwa ufaytidi oothana; hessi hanonna ixiko, enti azzanishe oothana; hessi hintena aybibaaka maaddenna.
18 Nuus Xoossaa woossite. Nu kahay geeshshi; nu ubba wode lo77oba oothanaw koyoos. 19 Taani hinteko ellesada yaana mela hinte taw minthidi Xoossaa woossana mela ta hintena hadara gayis.
20 Sarotethaa Xoossay, dorsa heemmiya nu Godaa Yesuusa, ba merinaa caaqo suuthan hayqope denthidaysi, 21 iya sheniya oothana mela lo77oba ubban I hintena danciso. Iya ufaysiyabaa Yesuus Kiristoosa baggara nunan Xoossay ootho. Yesuus Kiristoosa baggara Xoossaas merinaape merinaa gakanaw bonchoy gido. Amin7i.
22 Ta ishato, ta ha dabdaabiya hintew qanthan xaafida gisho, hinte ta zoriya saletonna ekana mela ta hintena woossayis.
23 Nu ishay, Ximotiyoosi qashope biletidaysa erite. I ellesidi taako yiiko ta iyara hintena bada be7ana.
24 Hintena kaaletheysatanne ammaniya ubbaa saro giite. Xaalepe yida ammaniya asay hintena saro yaagosona.
25 Xoossaa aadho keehatethay hinte ubbaara gido. Amin7i.