Yayqoobi Xaafida Kiita
Gaatha Qofa
Yayqooba kiitay, ammaniya asi gallas gallas ba de7uwa kaalethiya qofata oykis. Ha kiitay xaafetiday, biitta ubban laaletida tammanne nam7u Ayhude kochatasa. Ha maxaafa xaafey, cincatethi nuuni ooson peeshiya oge bessees; ammaniya asi mokobanne lo77o kandos oge bessiya odata misileda qoncisees.
Yayqooba kiitay, manqotethaba, duretethaba, paaceba, lo77o kandoba, qanaateba, ammanoba, lo77o oosoba, inxarsi haaroba, cincatethaba, ooshshaba, otoroba, ashketethaba, hara asa bolla pirdoba, ceeqetethaba, gencaba, woosabanne ammaniya asi oothanaw bessiyaba ubbaa qoridi bessees.
Maxaafa Ayfe Qofata
Sarotho (1:1)
Ammanonne cincatethi (1:2-18)
Sissinne kiitetethi (1:19-27)
Manqotethinne duretethi (2:1-13)
Ammanonne ooso (2:14-26)
Cincatethinne inxarsi haaroba (3:1-18)
Ha alamiyara dabotethi medhofa (4:1—5:6)
Danda7a, keehatethinne woosa (5:7-20)
1
1 Xoossaanne Godaa Yesuus Kiristoosa aylley, Yayqoobi, biitta ubban laaletida tammanne nam7u sheeshatas kiitida kiita.Maato 13:55; Mar 6:3; Hawa 15:13; Gala 1:19.
Saro, ay mela de7eetii?
Ammanonne Cincatethi
2 Ta ishato, hintena dumma dumma paacey gakiya wode hinte lo77oba demmidaada kumetha ufaysan ekite. 3 Hinte ammanuwa paacetethay danda7a hintew immeysa ereeta. 4 Hinte wursethi gakanaw danda7iko aybi pacey bayna polonne kumethi gideta. 5 Hintefe oodeska cincatethi dhayiko Xoossaa woosso. Iyaw imetana. Xoossay oonaka boronna ubbaas keehatethan immiya Xoosse. 6 Shin I woossiya wode sidhonna ammanon Xoossaa woosso. Sidhiya oonika carkoy sugin qaaxiya abba zule mela. 7-8 Nam7u qofi de7eynne ba ogiyan eqonna oonika Godaape aykoka demmana gidi qopofo.
Manqo Asinne Dure Asi
9 Ammaniya manqo asati, Xoossay entana dhoqu oothiya wode ufayto. 10 Qassi ammaniya dure asati Xoossay entana ziqi oothiya wode ufayto. Dure asati ciishshada dhayana.Isa 40:6-7. 11 Away ba mishaara keyidi maata melisin, ciishshay qoletees; iya lo77otethayka dhayees. Hessadaka, dure asati banta oosuwan daaburishe dhayana.
Ase Gakiya Paace
12 Metuwa xoonidi aadhidaape guye, Xoossay bana siiqeysatas immana gidi qaala gelida de7o kallachaa ekana gisho, meton genciya asi anjetidaysa. 13 Oonika paacetiya wode, “Tana Xoossay paacees” goopo. Xoossay iitan paacetenna; qassi I oonaka paacenna. 14 Shin issi issi asi ba iita amuwan gooshetiya wodenne cimetiya wode paacetees. 15 Hessafe guye, amotethi qanthatidi nagara yelees; qassi nagari diccidi hayqo yelees.
16 Ta siiqo ishato, cimetofite. 17 Lo77o imoynne kumetha anjo ubbay salopenne saluwa poo7uwa medhida Xoossaa aawape yees. Xoossay kuyada ubba wode laametenna. 18 Nuuni, iya medhetethas koyro gidana mela nuna tuma qaalan ba shenen yelis.
Sissinne Ooso
19 Ta siiqo ishato, haysa akeekite. Asi ubbay si7anaw elleso, shin odetanawunne hanqetanaw ellesopo. 20 Asa hanqoy Xoossay koyiya xillotethaa ehenna. 21 Hessa gisho, tuna hanotanne iitatetha ubbaa diggidi, Xoossay hinte wozanan tokida hinte shempuwa ashshanaw danda7iya qaala aadatethan ekite.
22 Shin Xoossaa qaala ooson peeshshitepe attishin, sissa xalaalan hintena cimmofite. 23 Qaala si7idi oothonna asi, I ba som7uwa mastooten be7iya asa mela. 24 I ba som7uwa be7idi bees, shin I ay daaniyako ellesi dogees. 25 Shin oonika aylletethafe kessiya polo higgiya akeekan be7idi, kaallidi naagey, si7idaysa dogonna ooson peeshshiya uray, ba ooso ubban anjetana.
26 Ba inxarsaa naagonna ammanayis giya uray bana cimees; iya ammanoy hada. 27 Xoossaa Aawa sinthan borey bayna geeshsha ammanoy haysa: aayiya aawu bayna naytanne am7eta maadonne alamiya tunaape bana naago.