Hose Maxaafa
Gaatha Qofa
Pudeha kawotetha wursetha laythan, Hosey, nabiya Amoxepe kaallidi nabe gidis. Hanotati meto gidi de7iya wode pudeha bagga Isra7eele kawotetha bolla Hosey tinbite odis.
Ha maxaafan, koyro heedzu shempotan, Hosey ba soo asara leemiso gididi Isra7eele sabbakis. Goday, Isra7eeley ammanetona biitta gideysa qoncisanaw koydi, Hosey layma maccas macho oothidi ekana mela odis. Ba yelida nayta woygidi sunthaneko iyaw odis. Nayta sunthay Isra7eeley wonto waanada pirdetaneko mallees. He nayta suntha birshethay, Izra7eele, (Xoossay laallana); Loruhaama (Maarotethi demmonaaro); Lo7aama (Ta ase gidenna) guussu.
Shempo 4—14 gakanaw de7iya kifiley, Hose machiya ammanetona macho gideysada, Isra7eeley Xoossas ammanetona ixidaysa Hose tinbitey besse. Gomera Hose aggada hara ba laggethotako bidaysada (shem 1), Isra7eeley Xoosse aggada bidaysa (shem 2) bessees. Gidoshin, Hosey ba ammanetona machiw dosana mela Goday kiittis. Hessika, Xoossay ba merina siiquwan Isra7eele dosidaysas leemiso. Goday Isra7eeles ammanetikoka, Isra7eeley wodepe woden Godaas ammanetabuku. Enti banta kawotetha ashshanaw Godan zempanaysa aggidi, banta olanchotaninne allaga biittata bolla zempidosona. Hessa xalaala gidonashin, “Nuus kathi immeynne mehey yeletana mela oothey nu eeqa xoossata” gidi entan ammanetidosona; enta goyinnidosona.
Ha maxaafan Goday Isra7eelenne Yihuda meton yeggidi, enti menthida caaquwa gisho oyshetana mela oothis. Shin enti he ubba haninka Goday enta dosees. Enti banta nagarape simmidi iyaw ammanetiko, I enta zaaridi ekanawunne anjanaw qaala gelis. Goday, “Ta hanqoy entafe simmida gisho, taani enta, enta iita hanuwape pathada, enta tuma dosana” (14:4) yaagis.
Maxaafa Ayfe Qofata
Hosey layma macho ekoy Isra7eele leemiso (1:1—3:5)
Ammanetona Isra7eele bolla odetida tinbite (4:1—10:15)
Ba asaas de7iya Godaa siiquwa (11:1-11)
Isra7eele zaara zaara nagara oothasu (11:12—13:16)
Sinthan de7iya maarotanne anjuwa (14:1-9)
1
1 Ooziyani, Iyo7atami, Akaazinne Hizqiyaasi kaalli kaalli Yihudan kawotida wode qassi Yo7aasa na7ay Iyorbaami Isra7eelen kawotida wode Bi7eera na7aa Hoseko yida Godaa qaalay haysa.
Hose Machiwnne Iya Nayta
2 Goday koyro Hose baggara odida wode “Ta asay taape haakidi iita laymatethi oothida gisho, neeni bada, layma maccas ekada layma nayta iipe yela” yaagis.
3 Hessa gisho, Hosey bidi, Dibilayma na7iw Gomero ekin, iya qanthatada adde na7a yelasu. 4 Yaatin, Goday Hoseko ne na7a suntha, “Izra7eele” (laallana woyko zerana) yaagada suntha. Ayis giiko, Izra7eelen gukida suuthaa gisho taani Iyyu kochaa qantha woden pirdana; Isra7eele kawotethaaka dhaysana. 5 He gallas taani Izra7eela zangaaran Isra7eele olanchota mentherethana.
6 Gomera nam7antho qanthatada, macca na7a yelasu. Yaatin, Goday Hoseko, “I suntha Loruhaama (Maarotethi demmonaaro) yaagada suntha. Ayis giiko, hizape guye taani Isra7eele asas qadhetike; entaw atto giike. 7 Shin taani Yihuda asaas qadhetana; taani enta dongen woyko mashshan woyko olan woyko paratan woyko para asatan gidonashin, taani Goday, enta Xoossay, ta wolqan enta ashshana” yaagis.
8 Gomera Loruhaamo dhanthi duuthidaape guye qanthatada hara adde na7a yelasu. 9 Yaatin, Goday Hoseko, “Iya sunthaa Lo7aama (Ta ase gidenna) yaagada suntha. Ayis giiko, hinte ta ase gideketa; taka hinte Xoosse gidike.
10 “Gidoshin, Isra7eele asay makanawunne taybanaw danda7etonna abba shafiya mela gidana. Enti, ‘Hinte ta ase gideketa’ geetetidi xeegetida bessan hinte ‘De7o Xoossaa nayta’ geetetana. 11 Yihuda asaynne Isra7eele asay issife shiiqidi bantaw issi halaqa dooridi di7etida biittafe simmananne injetidi daana. He gallasay Izra7eeles gita gallas gidana.