1 “Hinte ishata, ‘Ta ase’ qassi hinte micheta, ‘Maarotethi demmidaysata’ yaagidi xeegite.

2 “Hinte aayiw hanqetite; iyo kaccite. Ayis giiko, iya ta macho giduku; taka I azina gidike. Iya ba som7uwafe laymatetha mallaa diggo; laymatetha oosuwa ba dhanthata giddofe diggo. 3 Hessi hanonna ixiko iya yeletida gallasaada, taani iyo xire kallo ashshana. Qassi iyo melida mela biitta oothana; taani iyo saamon wodhana. 4 Enti laymepe yeletida nayta gidida gisho, taani I naytas qadhetike. 5 Enta aayiya laymatasu; kawushabaa hanada enta qanthatasu. Iya, ‘Taani ta kathaanne ta haatha, ta suufiyanne ta liinuwa, ta zaytiyanne ta ushsha taw immiya ta laggethota kaallada baana’ yaagasu. 6 Hessa gisho, taani I ogiya agunthan gordana; iya ba ogiya demmonna mela taani I yuushuwa gimben dirana. 7 Iya ba laggethota geedo woxana, shin gakuku; enta koyana, shin demmuku. Hessafe guye, ‘Ha77i duussaafe taw beniysi lo77o gidiya gisho, simmada ta koyro azinaako baana’ yaagana. 8 Kathaa, woyne ushshaanne zaytiya iw immidaynne enti Ba7aale eeqas yarshiya biraanne worqaa iw darsiday tana gideysa iya eronna ixasu. 9 Hessa gisho, kaxiya wode ta kathaa, teeriya wode ta woyniya iipe zaarada ekana. Iya ba kalluwa kammiya suufiyanne liinuwa iipe qaara ekana. 10 I laggethota sinthan taani I kalluwa qaarana; ta kushiyape iyo oonika ashshena. 11 Taani I ufaysa ba7aaleta ubbaa, ageena xeero gallasata, I Sambaata gallasata, laythan laythan bonchetiya ba7aaleta ashshana. 12 Iya, ‘Ta laggethoti taw immida ciga’ giya woyniyanne balase mithaa ta dhaysana; taani he bessa wora oothana; bazzo do7ati iya maana. 13 Iya tana dogada ba laggethota kaallada, sagaayotaninne alleeqotan alleeqetada, Ba7aale eeqas ixaane cuyisida gallasata gisho taani iyo seerana; yaagees Goday.

14 “Hessa gisho, taani iyo cimmada mela biitta ehada, iw siiqo qaalan odana. 15 Yan taani I woyne gade iw zaarada immana; Akoora zangaara (meto zangaara) iw ufaysa penge oothana. Gibxe biittafe keyida wodiyada ba geela7otetha laythan de7iya hanotan ufaysan yexana” yaagees.

16 He gallas iya tana, “Ta azinaw” yaagada xeegana; kaseysada, “Ta godaw” yaagada xeeguku. 17 Ayis giiko, taani I doonape “Ba7aale” eeqata sunthaa diggana; hizape guye taani iyo “Ba7aale” suntha xeegisike. 18 He wode taani ta asaa gisho sa7aa do7atara, salo kafotaranne biittara gooshetiya medhetethatara caaqana. Taani biittafe donge, mashshenne ola dhaysana. Enti biitta bolla saro daana.

19 Taani nena merinaw taw macho oothana; xillotethan, suure pirdan, merinaa siiquwaninne maarotethan taw giigisana. 20 Taani ammanetada nena taw giigisana; neka Godaa erana.

21 “He wode taani zaaro immana; taani salotas zaaro immana, saloti sa7aas zaaro immana. 22 Sa7ay kathaas, woyne ushshasinne zaytiyas zaaro immana; enti Izra7eeles (Xoossay tokana) zaaro immana. 23 Taani iyo ta gisho gada biitta bolla tokana; Kase taani, ‘Maarike’ gidaysata maarana; ‘Ta ase gideketa’; gidaysata, ‘Ta ase’ gaana. Entika tana, ‘Neeni nu Xoossaa’ yaagana” yaagees Goday.