1 Goday tana, “Isra7eele asay hara xoossatako simmidi, zabibe uythaa yarshanaw koykoka, Goday enta doseysada iyo dosa. Iya hara laggethiyabanne laymatiyaba gidikoka neeni iyo dosa” yaagis.

2 Yaagin, taani iyo tammanne ichashu bira santimeninne xeetanne ishatamu kilo giraame bangan shammas. 3 Taani iyo, “Neeni laymatonnanne hara addera doonna taara daro wode daanaw koshshees. Taanika neera daana” yaagas.

4 Isra7eele asay kawoy woyko halaqi bayna, yarshoy woyko eeqa tuussi bayna, efuude ma7oy woyko eeqa misiley bayna daro wode daana. 5 Hessafe guye, Isra7eele asay Godaa banta Xoossaakonne banta kawa Dawitako simmana. Wursetha wodiyan enti kokorishe, Godaakonne iya anjuwako yaana.