1 Isra7eele asato, ufaytofite! Hara kawotada poocu goopite! Hinte hinte Xoossaafe haakidi laymatideta; kathaa geeshshiya wudumman laymatethas immiya gatiya dosideta. 2 Hessa gisho, hinte wudummaafe kathi, gum7iya bessaafe woyne ushsha demmeketa; woyney hintew ayfena. 3 Enti Godaa biittan gam7okona. Efreemi Gibxe biitta simmana; Asoore biittan tuna kathi maana.

4 Enti Godaas woyne ushsha yarsho gussokona; enta yarshoy iya ufaysenna. He yarshoy entaw shocha mela gidana; hessa miya ubbay tunana. He kathay enta koshaa xalaala zaaranaasafe attishin, Godaara de7iya issifetethaas maaddenna. 5 Godaa hinte bonchana mela I hintew immida ba7aale gallasatan hinte ay oothanee? 6 Enti dhayope kessi ekikoka Gibxey enta shiishana; Mempisa katamay enta moogana. Enti shiishida bira miishe ubbaa sharaafi mittana; enti de7iya bessan buloy dolana.

7 Seera gallasi yis; pirda wodey gakis. Isra7eele asay hessa ero! Hinte nagaraa gishonne morketetha gisho nabey eeya mela Xoossa asi geetetidaysi gooshsha mela taybetis. 8 Nabey Xoossara gididi, Efreema naagees; shin iya ogiyan xihey yegetis; xoossa keethan iya morketethi naagees. 9 Gib7a kataman hanidaysada enti tunidosona. Xoossay enta naaquwa hassayana; nagaraa gisho enta seerana.

10 Goday, “Taani mela biittan woyne ayfe demmidaysada Isra7eele asaa demmas. Taani balase mithan koyro ayfe be7idaysada hinte aawata be7as. Shin enti Bi7eel-Fagoora geetetiya bessaa yidi, yeellayiya eeqas bantana dummayidosona; enti he dosida eeqada tunidosona. 11 Efreema bonchoy kafoda paalli dhayana; hizape guye yeloy baawa; qanthatoy baawa; atethi baawa. 12 Enti na7a yelidi dichiyaba gidikoka ta enta wodha wursana. Taani entafe haakida wode entana ayye! 13 Efreemi lo77o bessan toketida zamba mitha mela hanin be7as, shin ba nayta shukas aatha immis” yaagis.

14 Abeeti Godaw, entaw imma! Ne entaw ay immanee? Ne entaw boshetiya ulonne melida dhanthi imma.

15 Goday, “Enta iitatetha gisho taani Galgalan ixo doomas. Enta nagaraa gisho taani enta ta keethaafe gooddana; hizape guye ta enta dosike; enta halaqati ubbay geellata. 16 Efreemi deshetin, iya xaphoy melis; ayfeyka baawa. Enti na7a yelikoka taani enti dosiya nayta wodhana” yaagis.

17 Enti iyaw kiitetonna ixida gisho ta Xoossay enta pixiri holana; enti kawotethata giddon toylatishe daana.