1 Isra7eele asay daro ayfe ayfiya daayida woyne mela; enta ayfey darida mela eeqa yarsho bessata darsi keexidosona. Enta biittay duretida keena goyinniya eeqa tuussata alleeqisidi medhidosona. 2 Enta wozanay caaketis; ha77i enti banta nagaraa tookana. Goday enta yarsho bessata laallana; enta eeqa tuussata dhaysana.

3 He wode asay, “Nuuni Godaas yayyiboonna gisho, nuus kawoy baawa. Shin kawoy de7iyakoka nuus ay oothanee?” yaagana. 4 Enti hanonna ufaysa qaala geloosona; wordon caaqoosona; Hessa gisho, wodhiya harmey gaden doleysada enta bolla pirdi dolana. 5 Samaare kataman de7iya asay Beet-Aweenan de7iya mara misiliyas yashshan kokoroosona. Iya bonchoy iyape qaaretida gisho iyaw yeekana; he eeqa misiliya kahineti waassana. 6 He eeqa misiley Asoore tooketidi, bidi, gita kawas imota gididi imetana. Efreemi yeellatana; Isra7eeley eeqa misiliya gisho kawuyana.

7 Samaare kawoy haatha goponto gididi dhayana. 8 Isra7eele asay Aweena kataman eeqas goyinnishe, nagara oothiya dhoqa bessati laaletana. Enta yarsho bessan agunthinne gom7orey dolana. He wode enti deretako, “Nuna qosite!” zumatako, “Nuna genthite” yaagana.

9 Goday, “Isra7eele asaw, Gib7an hinte nagara ooso doomida wodiyape, hachi gakanaw nagara ooso aggibeketa. Hessa gisho, iita ootheyisata Gib7an oli wursibeenee? 10 Taani dosida wode he geellata seerana. Enti oothida daro nagaraa gisho taani enta seeriya wode kawotethati enta bolla dendana. 11 Efreemi kathi yedhanaw dosiya wadhi kessida wofaano mela. Shin taani iya lo77iya morgiyan qambara wothada waaxana. Yihuda asay worxafana; Yayqooba asay shirechana. 12 Goday yidi xillotethi hinte bolla bukisana gakanaw iya koyite. Hinte xillotethi zeriyaba gidiko merina siiqo cakana. Hessa gisho, othe biitta worxafite. 13 Shin hinte, hinte ogiyaninne hinte daro olanchotan ammanetida gisho, iitatethi zeridi nagaraa cakideta; hinte worduwa ayfiya mideta. 14 Hinte bolla wolqaama oli dendana; beni Kawoy Salmani Beet-Arbela katamaa olidi laallidaysadanne aayetanne nayta dhaysidaysada qassi hinte miixata dhaysana. 15 Beetele kataman de7eysato, hinte nagaray daro gidiya gisho hessa melabay hintena gakana. He gallas sa7i wontiya wode Isra7eele kawoy hayqana.