1 “Isra7eeley na7a de7iya wode iya dosiday tana; ta na7aa Gibxefe xeegas. 2 Taani enta darsada xeegin, enti taape daro haakidi bidosona. Ba7aale eeqatas yarsho yarshidosona; eeqa misiletas ixaane cuyisidosona. 3 Efreema asaa kushiya oykada hemethi tamaarsiday tana, shin enta pathiday tana gideysa erokona. 4 Taani enta qadheninne siiqo wodoron goochas; enta morgefe qambara denthada hokada enta muzas. 5 Enti taako simmonna ixidi Gibxe biitta simmana; Asoore biitta kawoy enta bolla kawotana. 6 Enta kataman mashshi dendana; enta katamata pengeta mentherethana; enta zoretay laaletana. 7 Ta asay taape haakanaw koyis. Enti Xoossaako waassikoka, I entana bonchenna. 8 Efreemi, taani nena waatada aggo? Isra7eele, taani nena waatada aatha immo? Taani nena waatada Adaama katamaada ootho? Taani nena waatada Xaboyma katamaada ootho? Taani nena daro dosiya gisho ta wozanay hessa ero geenna. 9 Taani hinte giddon de7iya Geeshsha Xoossaafe attishin, ase gidike. Hessa gisho, taani ta suulliya hanquwa hinte bolla ehike; nam7antho Efreema dhaysike; ta hanquwara hinteko yiike. 10 Enti Godaa kaallana; ika gaammoda gudana. I gudiya wode iya nayti wuloha baggafe kokorishe yaana. 11 Gibxefe kafoda, Asoorepe holleda paallishe yaana. Taani enta, enta keethan keethan wothana. Taani Goday hessa odas” yaagis.

12 Efreema asay wordon, Isra7eele asay cimon tana teqidosona. Yihuda asay ammanthiya Geeshsha Xoossaa bolla xaltaamis.