14
Godaako Simoy Ehiya Anjo
Isra7eele asaw, hinte nagaraa gaason dhubetidi kundida gisho ha77i Godaa, hinte Xoossaako simmite. Godaako simmidi, haysada yaagidi woossite; “Nu nagara ubbaafe nuna maara; nuuni nu mettersha ayfe gidida galataa new shiishana mela ne nuna ne keehatethan shiisha eka. Asoorey nuna ashshena; nu ola paratanka ammanetoko. Nuuni nu kushen medhida eeqa misileta ubbaa, ‘Nu xoossata’ gooko. Aaway baynaysatas qadhetey nena” yaagite.
Goday, “Ta hanqoy entafe simmida gisho, taani enta makalla hanuwape enta pathada, enta wozanape siiqana. Taani Isra7eele asaas aka gidana; enti ciishshada ciyidi, Libaanose zigaa mela xapho yeddana. Enta dolay cil7ana; enti shamahoda lo77ana. Enta sawoy Libaanose zigada tonku gaana. Asay simmidi ta kuya garsan shempana; enti dolada cil7ana; enti woyneda ciiyana; Libaanose woyne ushshada eretiyaba gidana. Efreema asaw, hizape guye eeqa misilera taw ay gahetethi de7ii? Hinte woosa si7eynne hintena naagey tana. Taani cil7o zigaa mela; hinte ayfe ayfana mela oothey tana” yaagees.
Cincatethi de7iya oonika haysa akeeko; wozani de7iya oonika hessa ero. Godaa ogey suure; xilloti he ogiyara hemetoosona; shin nagaranchoti iyan dhubetoosona.