Iyyu7eela Maxaafa
Gaatha Qofa
Nabiya Iyyu7eela qoncethay Xoossaa seerape iyako simobaanne maarotethi demmidi, Xoossan ooraxoba odees. Nabey Iyyu7eeli daro booley shaari salo kammida mela kumidi yeysanne biitta ubba midi dhayseysa be7is. Iyyu7eeli tuma olanchoti yidi Isra7eele kawotetha olidi dhaysanaysa be7is. Gidoshin, asay Xoossako simmiko, I enta maaranawunne zaaridi anjanaw qaala gelis.
Biittay xuugetida gisho kahineti azzanoosona; hari attoshin biittay ba huuphen yeekees. Godaa pirda gallasi matidaysa Iyyu7eeli be7is. Shin, ha7ika asay banta iita ogiyape Godaako simmiko, Goday enta zaaridi anjanaysa Iyyu7eeli odis.
Iyyu7eeli hanana gidi odidabaape qoncidi bentey ufaysa qaala. Xoossay ba adde nayta bollanne ba macca nayta bolla, yalagata bollanne cimata bolla, ba asa ubbaa bolla ba ayyaana gussanaw qaala gelis (2:28-32). Ha ufaysa qaalay Hawaareta Ooso maxaafan, Phanxeqosxe gallas, tuma gididaysa Phexroosi odis (2:16-21).
Maxaafa Ayfe Qofata
Boole gado (1:1—2:17)
Xoossay ba asaa zaaridi anjana (2:18-27)
Xoossay kawotethata pirdana (2:28—3:15)
Xoossay ba asaa zaaridi anjana (3:16-21)
1
Boole Gado
1 Batu7eela na7aa Iyyu7eelako Goday kiitida qaalay haysa. 2 Hinteno cimato, haysa si7ite! Yihuda biittan de7iya asa ubbay si7ite! Haysa melabay hinte wode woyko hinte aawata wode hani erii?
3 Haysa hinte naytas odite;
hinte nayti banta naytas odo;
enta nayti kaalliya yeletas odo.
4 Gondofe attida kathaa booley mis;
boolepe attida kathaa guddoy mis;
guddofe attida kathaa xaqoy mis.
5 Mal7iya woyney hintefe attida gisho,
hinteno, mathoteysato barkite yeekite!
Hinteno, woyne uyiya ubbati zeleelite!
6 Tayboy bayna booley ta biitta oykis;
Enta achay gaammo acha mela;
enta gacoy macca gaammo gaco mela.
7 Enti ta woyniya dhaysidosona;
ta balasiya mitha dhoggidosona.
Enti poqidi mida gisho,
woyniyanne balasiya tasheti puxu gis.
8 Geela7iya, ba giigida azinay hayqin,
kayo ma7o ma7ada yeekeysada hinteka yeekite!
9 Katha yarshoynne ushsha yarshoy
Godaa keethan dhayida gisho,
Godaa keethan oothiya kahineti yeekosona.
10 Goshshay mela attis; biittay yeekees;
kathay dhayis; woyneynne zaytey melis.
11 Gaden de7iya gisteynne bangi dhayida gisho,
hinteno goshshanchoto, kayotite;
hinteno woyne tokeysato, zeleelite!
12 Woyney melis; balasey shullis;
oromaaney, temirey, apiley,
gaden de7iya hara mithi ubbay melis;
hessa gisho, asape ufaysi haakis.
Maarotako Xeessi
13 Hinteno kahineto, kayo ma7o ma7idi yeekite;
hinteno yarsho bessa sinthan ootheysato, zeleelite.
Hinteno ta Xoossaa sinthan ootheysato,
xoossa keethi gelidi, kayo ma7o ma7idi aqite.
Katha yarshoynne ushsha yarshoy,
Xoossa keethan yarshiyabay baawa.
14 Xooma awaajite;
geeshsha shiiqo xeegite.
Cimatanne biittan de7iya asa ubbaa
Godaa hinte Xoossaa keethan shiishite;
yan Godaako waassite.
15 Godaa gallasay matis;
he gallasaa ayye!
He gallasay Ubbaa Danda7iya Xoossaa
hanqo gallas gididi yees.
16 Nu sinthafe kathi,
nu Xoossaa keethaafe,
ufaysinne ililsi dhayis gidennee?
17 Zeretida zerethay biitta giddon buuqis;
kathay dhayida gisho eley kallotis;
shaaley laaletis.
18 Heemmiya bessi bayna gisho,
mehey waassees.
Hari attoshin dorsa wudeyka
maata dhayidi un7etees.
19 Abeeti Godaw, bazzuwa tami mida gisho,
xaragi denban de7iya maata xuuggida gisho,
wora mithaa tama lacoy dhaysida gisho,
taani neeko waassayis.
20 Goggiya haathi melida gisho,
tami bazzon de7iya maata midigida gisho,
bazzo do7atika neeko waassoosona.