2
Booley Olanchoda Yaana
1 Xiyoonen moyze punnite;
ta geeshsha zumaa bolla waassite.
Biittan de7iya asi ubbay kokoro;
Godaa gallasay yees; karen de7ees.
2 He gallasay dhumanne caagana gallas;
shaaranne sakana dhuma gallas!
Zumaa bolla xalqey caareysada
daronne wolqaama booley biitta ma7ana.
Hessa melabay kase hanibeenna,
sinthafeka hessa melabay hanenna.
3 Entafe sinthara miya tami bees;
entafe guyera lacoy xuuggees.
Enta sinthay Gannate mela;
shin enta guyey booddila bazzo mela;
entafe aybika kessi ekenna.
4 Enta medhoy para medho mela;
enti ola parada adarsoosona.
5 Pari goochiya gaareda giiroosona;
deriya huuphera gupoosona.
Buuriya miya tama lacoda xuuggoosona;
ola baanaw keyida wolqaama olancho daanosona.
6 Enta sinthan asi kokorees;
yashshan asa som7oy kareexees.
7 Enti olanchoda woxoosona;
toora asada dirsaa bollara gupoosona.
Enti ubbay maaran boosona;
banta salpiyafe gaxa keyokona.
8 Issoy issuwara sugetokona;
ubbay qinxi gidi sinthe boosona.
Enti bantara eqeteyisata menthidi boosona;
enta teqiyabay baawa.
9 Enti katamaa oykoosona;
dirsa gimbiya bollara woxoosona.
Enti keetha bolla keyoosona;
kaysoda maskootera geloosona.
10 Enta sinthan biitti qaaxees;
saloti kokoroosona.
Awinne ageeni dhumees;
xoolintoti banta poo7uwa diggoosona.
11 Goday ba olanchota sinthan guummees;
iyaw kiitetiya olanchoti taybope bolla.
Godaa gallasay gitanne daro yashshees;
He gallasa danda7anay oonee?
Hinte Wozana Pheedhite
12 “Ha7ika xooman, yeehoninne azzanon
hinte polo wozanaape taako simmite.”
13 Hinte wozanaape attishin,
hinte ma7uwa peedhopite.
Godaa, hinte Xoossaako, simmite;
I, qadheynne maaroti kumidaysa;
I, hanqanaw ellesonaysanne siiqoy daridaysa;
I, hintena seeranaw ellesenna.
14 Goday hinte Xoossay,
ba hanquwafe simmidi,
hintena anjaneko ooni erii?
He wode Godaas hinte Xoossaas,
katha yarshonne ushsha yarsho yarshana.
15 Xiyoonen moyze punnite;
xooma awaajite;
geeshsha shiiquwa shiiqite!
16 Asaa shiishidi, hinte shiiquwa geeshshite;
cimata issife shiishite;
guutha naytanne dhammeyisata ashshofite.
Meddan de7eysati
banta quruxuwape keyo.
17 Godaas oothiya kahineti Xoossaa keethaa
barandaafenne yarsho bessaafe giddon eqidi yeeko.
Enti haysada yaagidi woosso;
“Abeeti Godaw, ne asaas qadheta;
kawotethati, ‘Enta Xoossay awunee? yaagana mela oothada,
ne asaa boresinne miichas yeggofa’ ” yaago.
Godaa Qadhiya
18 Goday ba biittas de7iya mishan
ba asaas qadhetis.
19 Goday zaaridi ba asa haysada yaagana;
“Heko, taani hintew kathaa, woyniyanne zaytiya,
kalsana gakanaw yeddana;
hizape guye kawotethata giddon hintena bores aggike.”
20 “Pudeha baggara yida booliya,
taani yedethada hintefe haassana.
Baysanne mela biitta enta gooddana;
sintha baggara de7eyisata Maxine Abba,
guye baggara de7eyisata Medetiraane Abbaa, yedethana.
Yan enti hayqidi xinqana.
tuma Goday wolqaamaba hintew oothis” yaagana.
21 Biittaw, hiza yayyofa;
Goday gitaba oothida gisho,
ufaytanne hashshu ga!
22 Hinteno sa7aa meheto, yayyofite;
bazzon de7iya maatay aacis.
Mithay ayfis;
balaseynne woyne ayfey burkukis.
23 Hinteno Xiyoone asato, ufaytite;
Godan hinte Xoossan, hashshu giite!
I, balgo ira hintew darsidi immis;
kaseysada silanne torche ira gidisidi immis.
24 Kathaa bukiya wudumman kathi kumana;
woyniyanne zaytiya gum7iya ollay kumidi palahana.
25 Kase taani hinte giddo yeddida,
wolqaama gondoy, booley, guddotinne xaqoti midaysa,
ta hintew zaarana.
26 Hinte min kalsidi palahiya kathi daana;
malaalsiyaba hintew oothida Godaa;
hinte Xoossa sunthu galatana;
ta asay zaaridi yeellatenna.
27 He wode taani Isra7eele giddon de7eysa,
taani Goday hinte Xoossaa gideysanne
taape hara xoossi baynaysa hinte erana;
ta asay zaaridi yeellatenna.
Godaa Gallasa
28 Hizape guye haysada hanana;
taani asa ubbaa bolla ta Ayyaana gussana.
Hinte adde naytinne macca nayti tinbite odana;
hinte cimati amuho amuhana;
hinte na7atethati qoncethi be7ana.
29 He gallasatan ta adde aylleta bollanne
ta macca aylleta bolla ta Ayyaana gussana.
30 Taani saloninne sa7an malaalsiyaba oothana,
tamanne salo dendiya cuyaa bessaana.
31 Gitanne yashshiya Godaa gallasay yaanape kase,
awi dhumana; ageeni suuthu daanana.
32 He wode haysada hanana;
Godaa sunthaa xeegiya ubbay attana.
Goday gidaysada Xiyoone zumaaninne
Yerusalaamen attidaysati daana.