1 Gibxe bolla Goday haysada yaagidi odis:Ermi 46:2-26; Hiz 29:1—32:32. “Heko, Goday eesotiya shaara toggidi, Gibxe yees. Gibxe eeqati iya sinthan kokorana; Gibxe asaa wozanay yashshan til7ana. 2 Gibxe asaa issuwa issuwa bolla denthana. Ishay ishaa bolla, shooroy shooruwa bolla, katamay katamaa bolla, kawotethay kawotethaa bolla dendana. 3 Gibxe asay eesho dhayana; taani enta halchuwa hada oothana. Enti banta eeqata, moytillera odeteyisata, bitanchotanne marota zore oychana. 4 Taani wozana mino gidida Gibxe kawa kushen aathada immana; I enta haarana” yaagees Ubbaafe Wolqaama Goday.

5 Nayle Shaafa guuxi guuxi baana; haathayka melana. 6 Dhaway xinqana; Gibxe haathati guuxananne melana; mayreynne maqay shullana; 7 Nayle Shaafa gaxan de7iya cil7obay melana; iya heeran zeretida katha ubbay melananne dhayana. 8 Molo oykeysati kayotana; Nayle shaafan gitenne molo manxaqo yeggiya ubbay yeekananne doccana. 9 Paadetida talbafe liino ma7o ootheysati, bootha ma7o daddiya dorzeti ufaysi qanxana. 10 Piiqeysatinne une oothiya ubbay kayotana.

11 Xo7aane haareysati eeya; Gibxe kawa zoriya cincati pathonna zore zoroosona. Yaatin, hinte Gibxe kawako, “Nuuni cincata nayta; nuuni beni kawota nayta” gaanaw waanidi danda7eetii? 12 Yaatin, ne cinca asati ha77i awun de7oona? Ubbaafe Wolqaama Goday Gibxe bolla oothanaw halchidaba ane enti new odonne nena erisonna. 13 Xo7aane haareysati eeyidosona; Mempisa haareysati cimetidosona. Gibxe zoriya gita asati iya balethidosona. 14 Goday enta giddon eeyisiya ayyaana yeddis; enti mathotida asi ba cooshshan gondoreteysada Gibxey ba ooso ubban gondoretana mela oothidosona. 15 Zamboy woyko boozi, zamba tashey woyko mayrey Gibxen oothanabay aybika baawa.

16 He gallas Gibxe asay maccasa mela gidana. Enti Ubbaafe Wolqaama Goday enta bolla qaathiya iya kushiya be7idi yashshan kokorana. 17 Yihudi Gibxe yashisana; Ubbaafe Wolqaama Goday enta bolla oothanaw qopida qofaa gisho Yihudaba si7iya ubbay yayyana.

18 He gallas Gibxe biittan de7iya ichashu katamati Kanaane qaalan odeteysatanne Ubbaafe Wolqaama Godaas ammanetanaw caaqeyisata gidana. He katamatape issoy, “Awa Katama” geetetidi xeegetana.

19 He wode Gibxe biittas gidduwan, Godaas yarsho bessay giigana; qassi Gibxe biitta zawan Godaas tuussi eqana. 20 Hessi Ubbaafe Wolqaama Godaas Gibxe biittan mallanne marka gidana. Enti bantana un7etheyisata gisho Godaako waassiya wode entaw ashsheysa kiittidi enta ashshana. 21 He wode Goday Gibxe biittan eretidaysa gidana; Gibxe asay he gallas Godaa erana. Yarshonne katha yarsho eki yidi iya goyinnana. Enti Godaas qangananne banta qangetha gathana. 22 Goday Gibxe biitta shocana; iyo zaaridi pathana. Enti Godaako simmana; I enta woosa si7idi pathana.

23 He gallas Gibxefe Asoore gakanaw dalga ogey keyana; Asoore asay Gibxe, Gibxe asay Asoore simeretana; Gibxe asay Asoore asaara issife goyinnana. 24 He gallas Isra7eeley Gibxeranne Asoorera heedzantho biitta gididi, sa7aas anjo gidana. 25 Ubbaafe Wolqaama Goday enta haysada yaagidi anjana: “Ta ase gidida Gibxey anjeto; ta kushe ooso gidida Assory anjeto; ta laata gidida Isra7eeley anjeto” yaagana.