20
Gibxenne Tophe Bolla Odetida Tinbite
Asoore kawoy Sargooni kiitida toora moconati yidi, Filisxeeme katamaa gidida Ashdooda olidi oykida laythi, Goday Amoxe na7aa Isayaasa haysada yaagis: “Ne kayo ma7uwa qaara; ne tohuwape caamma kessa” yaagis. Isayaasi Goday gidaysada oothidi kallonne mela tohon hemetis.
Yaatin Goday haysada yaagis: “Ta aylley Isayaasi Gibxenne Tophe bolla gakana metuwas malla gidana mela heedzu laythi kallonne mela tohon hemetis. Hessa gisho, Asoore kawoy, Gibxetas yeella gidana mela Gibxefenne Tophefe di7etida na7atethatanne cimata kallonne mela toho laaggidi efana. Tophen ammaneteysatinne Gibxen ceeqeteysati yayyana; yeellatana. He gallas Abbaa gaxan de7iya asay haysada yaagana: ‘Nuna Asoore kawuwape ashshana gidi ufaysi oothidi entako baqatida asaa bolla haysi gakiko, yaatin, nuuni waanidi kessi ekanee?’ yaagana” yaagis.