1 Abeeti Godaw, neeni ta Xoossaa. Taani nena dhoqu dhoqu oothana; ne sunthaa galatana. Neeni ne polo ammanetethan benipe qofetidi de7iya malaalsiya oosota oothadasa. 2 Neeni katamaa laaletha doore oothadasa; mino gimbe dirsay de7iya katamaa laalladasa. Allagata kawo keethay zaaridi katama gidonna mela oothadasa; zaaridi polo keexetenna. 3 Hessa gisho, mino asati nena bonchana; wozana mino kawotethata katamati new yayyana. 4 Neeni manqoy baqatidi attiya bessi, metootanchoy qosetiya bessi, uushope attiya geshenne awa seelape attiya kuya gidadasa. Wozana mino asaa hanqoy gimbera dom7ethiya uusho melanne 5 mela biittan honge mela. Shaara kuyay awa seela irxisiya mela neeni allagata yethaa si77i oothadasa; yaatin wozana mino asaa waasoy si77i gis.

6 Ubbaafe Wolqaama Goday asa ubbaas ha zumaa bolla gita gibira giigisana. He gibira bolla modho ashuwa, lo77o kathinne caalida woyne ushsha giigisis. 7 I ha zumaa bolla asa ubbaa kammida magarajuwanne kawotetha ubbaa bolla micetida kamaa dhaysana. 8 I merinaw hayqo mittana; Ubbaa Haariya Goday ayfe ubbaafe afuthaa quchana; ba asaa kawusha biitta ubbaafe diggana. Goday haysa odis.Isa 5:14; 1 Qoro 15:54; Qon 7:17; 21:4.

9 He gallas enti, “Tuma haysi nu Xoossaa; nuuni iyan ammanetida gisho I nuna ashshis. Nu Goday haysa; nuuni iyan ammanetida; ane iya atotethan ufaytoos; hashshu goos” yaagana.

10 Godaa kushey ashshanaw ha zumaa bolla shempana. Shin utulli urqara ollan yedheteysada Moo7abey yedhetana.Isa 15:1—16:14; Ermi 48:1-47; Amo 2:1-3; Sofo 2:8-11. 11 Haathe wadheysi ba kushiya yeddeysada enti banta kushiya yeddana. Shin Goday iya gene kushe oosuwan cimetonna, iya otoruwa kawushana. 12 Enti dhoqisidi gimbida mino dirsa gimbiya I wodisananne kawushana; I duge sa7an, ubba hirki baanan holana.