26
Xoono Mazmure
1 He gallas Yihuda biittan ha mazmurey yexetana.
Nuus mino katami de7ees;
Xoossay atotetha
iya yuushuwan gimbenne miixa oothis.
2 Ba ammanuwa naagiya xillo derey,
gelana mela kareta dooyite.
3 I nenan ammanetida gisho,
ba wozanaa nenan wothida uraa,
neeni polo sarotethan naagasa.
4 Goday merinaa zaalla gidiya gisho,
Godan merinaw ammaneta.
5 Dhoqan de7eyisata ziqi oothis;
dhoqu gida katamaa kawushis.
Iya sa7an duge yeggis;
biitta baanan holis.
6 Manqoti iya yedhana
un7etidaysati iya bollara hemetana.
7 Xillota ogey suure;
Abeeti Xilluwaw, neeni xillota ogiya giigisaasa.
8 Abeeti Godaw, nuuni ne higgiya naaganaw amottoos;
ne sunthaa bonchoynne ne teemay nu wozanaa amo.
9 Qamma taani nena laamotas;
wonta ta ayyaanay nena minthidi koyees.
Ne biitta pirdanaw yaa wode,
sa7an de7iya asay xillotethi tamaarees.
10 Iita asas keehatethi oosetikoka,
I xillotethi tamaarenna.
Suure biittan iitabaa oothees;
Godaa gitatetha erenna.
11 Abeeti Godaw, ne kushey dhoqu gis;
shin enti be7okona.
Ne asaas neeni mishetiya misha
be7idi yeellato.
Neeni ne morketas giigisida tamay
enta midi dhayso.Ibra 10:27.
12 Abeeti Godaw, nuus sarotethi immadasa;
nu ooso ubbaa ne oothadasa.
13 Abeeti Godaw, nu Xoossaw,
hara godati nuna haaridosona;
shin nuuni ne sunthaa xalaala bonchoos.
14 Enti hayqidosona; simmidi de7on dookona.
Ne seerin dhayida gisho, zaaridi dendokona.
Enta qofisuwa ubbaa quchada dhaysadasa.
15 Abeeti Godaw, neeni kawotethaa darsadasa;
kawotethaa darsada neeni bonchetadasa;
biitta zawa ubbaa dalgisadasa.
16 Abeeti Godaw, meto wode enti nena koydosona.
Ne enta seerida wode nena kalkashidi woossidosona.
17 Abeeti Godaw, qanthatida maccasi,
yelo wodey gakin un7etada waasseysada,
nuuni ne sinthan hessada hanida.
18 Nuuni qanthatida; iqetida;
shin carko yelida.
Nuuni sa7aas atotethi ehibooko;
biittan de7iya asaa yelibooko.
19 Hayqida ne asay paxana;
enta ahay dendana.
Hinteno, biitta garsan de7eysato,
dendidi ufaysa mazmure yexite.
Hinte akay wonta aka mela;
biittiya hayqidaysata zaarada immana.Daane 12:2.
20 Ta asaw, bidi hinte soo gelidi,
kariya hinte bolla gordite.
Godaa hanqoy aadhana gakanaw,
guutha wodes hintena qosite.
21 Biitta bolla de7iya asaa,
enta nagaraa gisho seeranaw,
Goday ba de7iya bessaafe keyidi yees.
Biittiya ba bolla gukida suuthaa qoncisana;
hayqidaysata zaarada genthuku.