32
Xillotethi Kumida Kawotethi
Heko, kawoy xillotethan kawotana; haareysati suuretethan haarana. Issi issi asi ba huuphen carkofe geemmiya bessi, gotepe qosetidi attiya bessi gidana. Mela biittan goggiya haatha melanne saamo biittan gita zaalla kuya mela gidana. Xeelliya asata ayfey qilim7enna; si7iya asata haythay hayzidi si7ana. Eesotiya asaa wozanay erananne akeekana. Dedotiya asaa inxarsay biletana; geeshshidi odetana. Hizape guye eeyi asi erancho geetetenna; iita asi bonchetenna. Eeyay eeyatethi odetees; iya wozanay nagara qopees. Godaa bolla minoba odetees; iya bolla iitabaa maqetees: koshatidaysas kathi immenna; saamotidaysa haathe diggees. Gene asa qofay iita; manqoti suureba odetikoka enta dhaysanaw wordon iita qofa qopees. Lo77o asi lo77oba halchees; he lo77o halchuwan minnidi de7ees.
Yerusalaame Maccasa
Hinteno qofi bayna de7iya maccasaw, dendite; ta odeysa si7ite; hinteno ammanetidi de7iya macca nayto, ta hintew odeysa si7ite. 10 Laythi kumonna hinte ammanetidi de7eysati kokorana; woyne iya wodiyan maxeketa; tokidabaape ayfe shiisheketa. 11 Hinteno injetin de7iya maccasaw kokorite. Hinteno ammanetidi de7iya macca nayto yayyite. Hinte ma7uwa qaaridi kayo ma7o hinte xeessan dancite. 12 Lo77o gaden ayfiya woyney dhayida gisho, azzanidi hinte tiraa qoxite. 13 Agunthinne kinchotey ta asaa gadiyan dolis. Asay ufaytidi de7ida keethatasinne katamaas yeekite. 14 Kawo keethaynne daro asay de7iya katamay baysatana; miixatinne gimbe shakoti merinaw laaletana; wora hareti ufaytiya bessinne dorsa wudey heemetiya bessi gidana.
15 Hessi hananay, Ayyaanay nu bolla gukana gakanaw, mela biittay araddana gakanawunne aradda biittay wora gidana gakanaasa. 16 Hessafe guye, mela biittan suure pirdi, aradda biittan xillotethi daana. 17 Xillotethi sarotethi ehana, wopatethinne ammanetethi merinaw biitta kumana. 18 Ta asay saroy kumida keethan, ammanthiya bessaaninne wopu gida son shempidi daana. 19 Shachi bukidi wora dhaysiyakoka, qassi katamay kumthi laaletiyakoka, 20 shaafata gaxan hinte kathaa zeridi, hinte mehiyasinne hinte haretas hentha bessi demmeysati hinte anjetana.