1 Nena dhaysona de7ishin haraa dhayseyso, nena aathidi immonna de7ishin haraa aatha immeyso, nena ayye! Ne dhayso aggida wode nena dhaysana; ne aatha imo aggida wode nena aathidi immana.

2 Abeeti Godaw, nuna maara; nuuni nena ufaysan naagoos; wonta wonta nuus wolqa gida; meto wode nuna ashsha. 3 Ne girsaa deshuwan derey baqatees; neeni nuna maaddanaw dendiya wode kawotethati laaletoosona. 4 Gondoy shiiqeysada hinte di7oy shiiqana; booley dirgeysada asay iya bolla dirgana.

5 Goday bolla de7iya gisho, dhoqu dhoqu gis; Xiyoone suure pirdaaninne xillotethan kunthana. 6 I hinte wodiyas ammanthiya baaso gidana; hintew atotethi, cincatethinne eratethi gidana; Godaas yashshi ha ubba shaluwas qulpe gidana.

7 Heko, goobati oge bolla waassoosona; sigethanaw kiitetidaysati cametidi yeekosona. 8 Wogga ogeti kaysatidosona; ogiyara kanthiya asi baawa. Caaqoy laaletis; katamati kadhetidosona; boncho asati boretidosona. 9 Biittay azzanis; daaburis; Libaanosey yeellatidi melis; Saarona zangaaray mela biitta gidis. Baasane deriyaninne Qarmeloosa deriyan de7iya mitha haythay qoqofetis.

10 Goday haysada yaagees: “Ha77i taani dendana; ha77i taani bonchetana; ha77i taani dhoqu dhoqu gaana. 11 Hinte utulla qanthatidi puno yelideta; hinte shempoy hintena tamada maana. 12 Asay booqinte shuchada taman xuugetana; qassi agunthada taman eexana. 13 Hinteno, haahon de7eysato, ta oothidaysa si7ite; matan de7eysato ta wolqaa akeekite” yaagees.

14 Xiyoonen de7iya nagaranchoti dagammidosona; Xoossaa eronnaysati kokoridosona. Enti, “Nu giddofe miya tamaranne merinaw eexiya lacuwara daanaw danda7ey oonee?” 15 Xillotethan hemetey, suure odetey, bessonna ogera bentiya go77a ixey, ba kushiya wodhaafe ekonna mela diggey, shempo wodhoba si7onna mela ba haythaa tuccey, iitabaa xeellonna mela ba ayfiya kammey, 16 he uray dhoqa bessan daana. I, qosetidi attiya bessay mino zaalla gidana; iya kathay iyaw imetana; I, uyaa haathay pacenna.

17 Hinte ayfey kawa, iya yegelssara be7ana; haahon de7iya biitta demmana. 18 Hinte, “Halaqay awun de7ii? Giira ekeysi awun de7ii? Gimbe shakota halaqay awun de7ii?” yaagidi hinte wozanan beni yashshiya wodiya qopana. 19 Wozana mino asaa, hintew gelonna doonan odetiya asaanne inxarsay dedotiya asaa hizape guye hinte be7eketa.

20 Nuuni nu ba7aale bonchiya Xiyoone katamaa be7ite! Wopu gidi de7iya, iya dhishey shodetonna, iya wodoroy duuxonnanne iya dhishey qaaxonna dunkaane mela hanida Yerusalaame katamaa hinte, hinte ayfen be7ana. 21 He bessan Goday nuus wolqaa gidana. He bessay dalga safanne goggiya haatha mela gidana. Wogoloy iya bollara baanaw danda7enna; gita markabeti yaara kanthanaw danda7okona. 22 Goday nuus pirdeysa; Goday nuus higge immeysa; Goday nu kawa; I nuna ashshana.

23 Ne qasho wodoroy dol7ana; markabiya tuussay shuggana; iya sharayka toletibeenna. He wode daro di7o shaaketana; hari attoshin wobbetika di7o ekana. 24 Xiyoonen de7iya oonika “Tana sakees” yaagenna; yan de7iya asaa nagaray atto geetetana.