1 He wode, Baldaana na7ay, Babiloone kawoy Mardook-Baldaani, Hizqiyaasi hargidi paxidaysa si7ida gisho, dabdaabenne imota Hizqiyaasas yeddis. 2 Hizqiyaasi kiitetidi yida asata mokis. Ba shaluwa minjiya keethan de7iya bira, worqaa, sawuwa, lo77o zayte, ba ola miishetanne ba shaluwa minjiya keethan de7iyaba ubbaa enta bessis. Ba son woyko ba gadhuwan de7iyaba ubbaafe Hizqiyaasi enta bessonna aggidabay baawa.

3 Nabey Isayaasi kawa Hizqiyaasako bidi, “Ha asati woygidona? Awupe yidona?” yaagidi oychis.

Hizqiyaasi, “Enti taako, haaho biitta Babiloonepe yidosona” yaagis.

4 Isayaasi zaaridi, “Enti ne son ay ay be7idonaa?” yaagidi oychis.

Hizqiyaasi, “Enti ta gadhon de7iya ubbaba be7idosona; ta shaluwa minja keethan de7iyabaape taani enta bessonnabay baawa” yaagis.

5 Yaatin, Isayaasi Hizqiyaasako, “Ubbaafe Wolqaama Goday giyaba si7a. 6 ‘Neeni, kawo gadhon de7iyaba ubbaynne ne mayzati hachi gakanaw shiishidaba ubbay kumthi di7etidi, Babiloone biitta baana wodey yaana; aybika attenna. 7 Qassi neepe yeletida ne ashonne ne suuthu gidida ne kochati di7etidi baana; Babiloonen kawo gadhon shuufa gididi oothana’ yaagees”Daane 1:1-7; 2 Kawo 24:10-16; 2 Taari 36:10. yaagis.

8 Hizqiyaasi zaaridi, “Neeni odida Godaa qaalay lo77o. Shin ta laythan saronne wopa gido” yaagidi qopis.