40
Minthetho Qaala
1 Hinte Xoossay haysada yaagees:
“Ta deriya minthethite! Minthethite!
2 I aylletethan de7ida wodey poletis;
iya nagaray atto geetetis;
ba nagaraa gisho, Goday iya dako seeridaysa,
Yerusalaames liiqo qaalan odite; awaajite” yaagees.
3 Haysada giya girsay si7etees;
“Mela biittan Godaa ogiya giigisite;
nu Xoossaas Araba mela biittan*Aykoyka bayna manqo biitta woyko mela biitta woyko xuugetida biitta guussu horoga sitti oothite.Maato 3:3; Mar 1:3; Yoha 1:23.
4 Zangaara ubbay dhoqu gaana;
dereynne zumay ziqi gaana;
iita ogetinne gela kessati dembatana.
5 He wode Godaa bonchoy qoncana;
asho ma7ida ubbay hessa issife be7ana.
Godaa doonay haysa odis” yaagees.
6 Issi girsi, “Waassa” yaagishin si7as;
taani, “Woygada waasso?” yaagas.
“Asi ubbay maata mela;
iya boncho ubbay ciishsha mela.Yay 1:10-11; 1 Phex 1:24-25.
7 Godaa iya bolla shempiya wode,
maatay melees; ciishshay qoqofetees;
asi tuma maata mela.
8 Maati melees; ciishshi qoqofetees;
shin nu Xoossaa qaalay
merinaw eqidi de7ees” yaagada waassa.
9 Neno Xiyoones lo77oba odeyso;
zuma bolla keya.
Neno Yerusalaames lo77oba odeteyso;
ne qaala dhoqu oothada waassa.
Yayyofa; dhoqu ootha;
Yihuda katamatas, “Hinte Xoossay haysish” yaaga.
10 Heko, Ubbaa Haariya Goday wolqara yees;
iya qesey iyaw haarana.
Iya woytoy iyara de7ees;
ciggiya gatey iya sinthana.
11 I ba wudiya henthanchoda heemmana;Hiz 34:15; Yoha 10:11.
Ba dorsa marata ba qesiyan shiishana;
enta ba ki7on idimmana;
dhantheyisata loddara kaalethana.
12 Haathata ba kushe qaaqan,
salota takadhon likiday,
biitta baana daachon makiday,
deretanne zumata mizaanen likiday oonee?
13 Godaa Ayyaana eriday,
iya zoridi tamaarsiday oonee?Roome 11:34; 2 Qoro 2:16.
14 Iyaw qoncisana mela oona zore oychidee?
Suure pirdaa iya tamaarsiday oonee?
Iya cincatethi tamaarsiday,
iya akeeka bessiday oonee?
15 Heko, kawotethati xuggan de7iya issi xoko mela;
enti mizaane bolla de7iya baana mela;
I yuushoy abban teqetida biittata baanada likes.
16 Libaanose mithay yarsho bessan eexanaw gidenna;
iyan de7iya do7ati xuussa yarshos gidokona.
17 Kawotethati ubbay iya sinthan baynaba mela;
enti iya sinthan ubba aykoka gidokona;
baynabapeka laafa.
18 Yaatin, Xoossaa hinte oodera ginayetii?
Ayba misilera gathidi xeelletii?
19 Kushe hiillanchoy eeqa misile giigisees;
worqa sheesheysi worqan lanxees;
bira sheesheysi iya bolla
bira santhalaata medhees.
20 Miishey bayna manqoy,
yarshos xoodhonna mithi doorees.
Misiley qaaxonna mela essanaw
kushe hiillancho koyees.
21 Eribeeketii? Woyko si7ibeeketii?
Haysi hintew koyrope odetibeennee?
Woyko sa7i medhetoosape
haysa hinte akeekibeketii?
22 I biitta gertuwafe bolla baggan
ba araatan uttees;
biittan de7iya asati xaqo mela.
Salota gesheda miccees;
dunkaaneda de7iya bessi oothidi tolees.
23 I, halaqata baynabaada oothees;
ha alamiya haareyisata hada kessees.
24 Enti toketidi buroo gam7onnashin,
zeretidi buroo xapho yeddonnashin,
Goday enta bolla carko yeddis;
enti melin gotey enta punoda efis.
25 Yaatin, tana oodera likeyetii?
Tana oodera ginayetii? yaagees geeshshay.
26 Hinte ayfiya dhoqu oothidi salo xeellite;
ha xoolintota medhiday oonee?
I enta olanchoda kaalethees;
enta taybuwa erees.
I enta ubbaa enta sunthan sunthan xeegees;
iya wolqa gitatethaafenne minotethafe dendoysan,
entafe issoyka dhayenna.
27 Neno Yayqoobaa, neno Isra7eele,
Ta ogey Godaape geemmis;
ta pirday Xoossaafe qosetis;
yaagada ayis odetay?
28 Erabikii? Si7abikii?
Goday merina Xoossa;
biitta ubbaa medhiday iya.
I daaburenna; woyko argaacena;
oonika iya qofaa eranaw danda7ena.
29 I daaburidaysatas wolqa immees;
minotethi baynaysas minotethi gujees.
30 Hari attoshin yalaga nayti
daaburoosona; argaacosona;
na7atethati daaburidi kundoosona.
31 Shin Godaa ammanetidi naageysati,
banta wolqaa oorathana.
Enti arganthada qefen paallana;
woxana, shin daaburokona;
hemetana, shin argaacokona.