41
Isra7eele Maaduwa
1 Hinteno, yuushoy abban teqetida biittato,
si77i gidi, taani odeysa si7ite!
Derey banta wolqaa ooratho;
enti haa shiiqidi, odeto;
ane nuuni pirdetanaw issife shiiqoos.
2 “Doloha baggafe issuwa denthidi biya bessa ubban xoono immey oonee?
I kawotethata iya kushen aathidi immees;
kawota iyaw haarisis.
I enta ba mashshan bido kessees;
ba dongiyan enta puno oothees.
3 I enta yedethishe, iya tohoy kase yedhiboona
ogiyara saro kanthees.
4 Haysa oothidaynne poliday
yeletethaaka koyrope xeegiday oonee?
Taani Goday, koyruwara de7ayis
wursetharaka de7ey tana” yaagees.
5 Yuushoy abban teqetida biittati,
hessa be7idi yayyidosona;
sa7aa gaxan de7eysati kokoridosona.
Enti issife shiiqidi taako yidosona.
6 Issoy issuwa maaddees;
ba ishaa, “Minna” yaagees.
7 Kushe hiillanchoy worqa sheesheysa minthethees;
naariqan qoxidi lee7iseysi
baachan birata seeriseysa, “Minna” gees.
I birata dhantheysa, “Lo77o oothaasa” yaagees;
eeqay qaaxonna mela mismaaren dhishees.
8 “Shin neno Isra7eele, ta aylliyaw,
ta doorida Yayqoobaa,
ta laggiya Abrahaame kochaw,2 Taari 20:7; Yay 2:23.
9 taani nena biitta gaxape ehas;
haahosoope xeegada, ‘Neeni ta aylle’
taani nena dooras; taani nena yeggike.
10 Yayyofa, taani neera de7ayis;
dagammofa, taani ne Xoossaa.
Taani nena minthana; nena maaddana;
taani nena xooniya ta ushacha kushiyan katisana.
11 Ne bolla hanqetiya ubbay yeellatidi kawuyana;
neera eqeteysati baynaba gidana.
12 Ne morketa neeni koyana;
shin enta demmaka;
nena oleysati baynaba gidana.
13 Taani Goday, ne Xoossay,
ne ushacha kushiya oykana;
yayyofa, taani nena maaddana.
14 Neno guxuniyaw, Yayqooba, hinteno Isra7eele asaw,
yayyofite; taani hintena maaddana;
hintena woziya Isra7eele Geeshshay tana.
15 Heko, taani nena oorathi,
qaranne achara de7iya,
kathi qoxiya miishe oothas.
Neeni dereta qoxada liiqisana;
zumataka puno oothana.
16 Neeni enta punnana; carkoy enta efana;
shin neeni Godan ufaytana;
Isra7eele Geeshshan bonchetana.”
17 “Manqotinne metootanchoti haathe koyana,
shin demmokona; enta qoodhey saamon melana.
Gidoshin, taani Goday enta si7ana;
taani, Isra7eele Xoossay, enta aggike.
18 Taani mela zumata bolla shaafa,
zangaaratan pulto dhuusana.
Bazzuwa haathi eelliya bessi,
mela biitta pultoy keyaso oothana.
19 Taani mela biittan, ziga, soqala mithi,
barseneete mithaanne shamaho dolisana.
Mela biitta xiiddi, maaroynne
caci kumida biitta oothana.
20 Isra7eele Geeshshay hessa medhidaysanne
Godaa kushey hessa oothidaysa
asay be7ana, erana, qopananne
akeekana mela taani hessa oothas.”
21 “Ane hinte mootuwa shiishite” yaagees Goday;
“Ane hinte marka haa ehite” yaagees Yayqooba kawoy.
22 Ane enti banta eeqata haa eho,
aybi hananeeko enta eeqati nuus odo.
Nuuni akeekana melanne enta wursethaa erana mela
kase hanidabay aybeko nuus odo;
woyko sinthafe hananaba nuus qonciso.
23 Hinte xoossata gideysa nuuni erana mela
sinthafe yaanaw de7iyaba nuus odite.
Nuuni dagammana melanne yayyana mela,
lo77o gidin iita gidin ane issiba oothite.
24 Shin hinte baynaba mela;
hinte oosoyka hada;
hintena dooriya asayka ixetidaysata.
25 Taani pudeha baggafe issuwa denthin,
I yees.
Ta sunthaa xeegiya issoy dolohape yaana;
oto medheysi urqa yedheysada,
I kaaletheyisata yedhana.
26 Nuuni erana melanne I like gaana mela
kasetidi nuus haysa odiday oonee?
Hintefe oonika kasetidi haysa qoncisiday,
woyko awaajiday woyko ba qaala sissiday baawa.
27 Taani haysa kasetada Xiyoones odas;
taani Yerusalaames mishiraacho odeysa immas.
28 Shin taani xeelliya wode issoyka baawa;
taani zore oychiya wode enta eeqata giddofe
zaaro immiya issoyka baawa.
29 Heko, enti ubbay hada; enta oosoyka pathenna;
sheeshidi medhida enta misiletika carko.