52
1 Neno Xiyoone, barka; barka,
minotethi afilada ma7a.
Neno geeshsha katame, Yerusalaame,
ne boncho ma7uwa ma7a.Qon 21:2, 27.
Hizape guye qaxaretonaynne
tuni ne giddo gelenna.
2 Neno, di7etida Yerusalaame, ne baana qoqofa;
dendada ne araata bolla utta.
Neno Xiyoone asaw,
ne qoodhen qashetida santhalaata birsha.
3 Ubbaa Haariya Goday haysada yaagees:
“Hinte kase gatey bayna bayzetideta;
ha77i qassi miishe immonna coo wozetana.
4 Goday haysada yaagees:
Ta asay koyro bete asi gididi Gibxe bis;
guyepe Asooreti ta asaa coo un7ethidosona.
5 Xoossay haysada yaagidi odees:
Ta asay gatey bayna coo di7etidi bin,
taw haysan aybe de7ey?
Enta haareysati toochoosona;
ta sunthay ubba wode cayetees.Roome 2:24.
6 Hessa gisho, ta asay ta sunthaa erana;
he gallas haysa odey tana gideysa enti erana;
ee, I tana” yaagees Ubbaa Haariya Goday.
7 Lo77o mishiraacho ehiya,
sarotethaa awaajiya, atotethi odiya,
Xiyooneko, “Ne Xoossay kawotis” yaagishe
deriya bollara yaa tohoti waani lo77oona.
8 Ne katamaa naageysati banta qaala dhoqu oothidi,
ufaysan issife yexoosona.
Goday Xiyoone simmiya wode
enti banta ayfen be7ana.
9 Hinteno Yerusalaamen laaletida bessato,
issife ufaysan yexite;
Goday ba asaa minthethis;
Yerusalaame wozis.
10 Goday ba geeshsha qesiya
kawotethata ubbaa sinthan qoncisis.
Biitta gaxaa gakanaw de7iya
asa ubbay nu Xoossaa atotetha be7ana.
11 Hinteno Godaa miishiya tookeysato, shaaketite,
shaaketite, yaape keyite.
Tunabaa bochofite; iya giddofe keyite;
hintena geeshshite.
12 Shin hinte keyishe eeson keyeketa;
woyko goodetidi beeketa.
Goday hintefe sinthe aadhidi kaalethana;
Isra7eele Xoossay guyera gididi hintena naagana.
Waaye Ekiya Aylle
13 “Heko, ta aylley akeekan oothana;
I bonchetidi, dhoqu dhoqu gaana; daro gitatana.
14 Iya som7oy asa ubbaafe,
iya medhoy asa naytape aadhidi qohetis;
iya be7idi daro asay dagammidosona.
15 Shin ha77i daro kawotethati ubbay
iyaban malaaletana;
iya gaason, daro kawoti banta doona oykana.
Enti bantaw odetiboonnaba be7ana;
si7iboonaba akeekana” yaagees.