53
1 Nuuni odidaba ooni ammanidee?
Godaa qesey ooddes qoncidee?Yoha 12:38; Roome 10:16.
2 I iya sinthan mela biittan aacida duruma mela;
xapho yeddida dola mela diccis.
Nuuni iya loythi xeellonna mela
mali woyko teemi baawa.
Nuuni iyako shiiqonna mela
cuchu mal7o gidenna.
3 I asan kadhetis, ixetis;
I metopenne azzanope
shaaketi eronna asi gidis.
Asi iya be7anaape gidi
ba som7uwa wora zaariya asada kadhetis;
nuuni iya bonchibooko.
4 I tuma nu waayiya baw ekis;
qassi nu daabura tookis.Maato 8:17.
Shin nuuni, I Xoossan deshetidi kundidadanne
madunxidaada qopida.
5 Shin I nu nagaraa gisho,
cadetidi madunxis;
nu qohuwa gisho shocetidi liiqis.1 Phex 2:24.
Iya seeran nuuni saro demmida;
iya madunthan nuuni paxida.
6 Nuuni ubbay oge balida dorsada wora bida;1 Phex 2:25.
nu ubbay nu ogiya ogiya bida.
Shin Goday nu ubbaa naaquwa
iya bolla wothis.
7 I un7etis; qohetis;Qon 5:6.
shin ba doona dooybeenna.
Shukanaw efiya urge dorsada laagetis;
ba ikisiya meediya uraa sinthan
si77i giya dorsa mela aykoka pogibeenna.
8 Enti iya un7ethoninne geella pirdan efidosona;
I ta asaa nagaraa gisho shocetidi,
de7on de7eyisata biittafe kichidaysa
iya kochaafe ooni akeekidee?
9 Iya doonan bali bayna, I, iitaba oothonna,
ba hayquwan iita asatara taybetis;
iya duufoy dure asatara gidis.1 Phex 2:22.
10 Shin iya qohetethaynne iya un7etethay
Godaa shene gidis.
I bana nagara yarsho oothiya wode
ba kochaa be7ana.
Iya laythay aduqana;
Godaa sheney iya kushen poletana.
11 Ba shempuwa waayiyape guye,
I de7o poo7o be7ana; ufaytana.
Ta xillo aylley ba eratethan darota xillisana;
enta qohuwaka tookana.
12 Hessa gisho, taani iya gishuwa
gita asata giddon immana;Mar 15:28; Luqa 22:37.
minotara I di7uwa shaaketana.
I ba shempuwa hayqos aathidi immidi,
iitatara paydetis.
I daro asaa nagaraa tookis;
geellatas gaannatis.