61
Atotetha Mishiraacho
1 Ubbaa Haariya Godaa Ayyaanay ta bolla de7ees;
manqotas lo77oba odana mela Goday tana tiyis.
Wozani meqidaysata koolana mela,
di7etidaysata la77a kessana melanne
qashetidaysata billana mela Goday tana kiittis.
2 Dosetida Godaa laytha odana mela,
nu Xoossay halo keyana gallasaa awaajana mela,
azzaneyisata ubbaa minthethana mela tana kiittis.
3 Xiyoonen kayoteysatas, bido gisho kallacha,
yeeho gisho ufaysa zayte,
azzano gisho galata ma7o immana mela tana kiittis.
Enti Goday ba bonchuwas
tokida xillo mitha geetetidi xeegetana.
4 Enti beni laaletida bessata zaaridi keexana;
beni kundida bessata zaaridi essana.
Enti daro yeletethaafe kase laaletidi
onida katamata zaaridi keexana.
5 Allaga asati hinte dorsa wudiya heemmana;
imathati hinte gadiya goyana
enti hinte woyne gadiya naagana.
6 Asay hintena, “Godaa kahinetanne
nu Xoossaa oosanchota” yaagidi xeegana.
Hinte kawotethata duretetha maana;
enta shaluwan hinte nashetana.
7 Ta asay banta yeella gisho nam7u kushe ekana;
banta kawusha gisho laatan ufaytana.
Hessa gisho, hinte enta biittan dako laattana;
hinte ufaysay merinaa ufaysi gidana.
8 “Taani, Goday suure pirda dosayis;
bonqenne iita ooso ixayis.
Taani tuma enta oosuwa gatiya qanxana;
Taani entara merinaw caaqana.
9 Enta kochati kawotethata giddon,
enta nayti dereta giddon eretana;
enta be7ida ubbay taani, Goday,
enta anjida asi gideysa erana.”
10 Taani Godan daro ufaytayis;
ta shempiya ta Xoossan hashshu gawusu.
Ekeysi ba huuphen kallacha wotheysada,
geliyara bana alleeqiseysada,
I tana atotetha ma7o mayzis;
xillotethi afila bollara gujis.
11 Biittafe mithi maati doleysada,
gadey tokidaba dicheysada,
Ubbaa Haariya Goday xillotethinne
galata kawotetha ubbaa sinthan purcisana.