62
Xiyoone Ooratha Suntha
1 Xiyoone gisho, taani si77i giike;
Yerusalaame xillotethay poo7oda,
I atotethay wonta xalqeda keyana gakanaw
taani si77i giike.
2 Kawotethati ne xillotethaa,
kawoti ubbay ne bonchuwa be7ana.
Goday sunthiya ooratha sunthan
neeni xeegetana.
3 Neeni Godaa kushen lo77ida
kawotetha kallacha gidana.
4 Neeni, “Dogetidaaro” geetetaka;
ne biittiya, “Dhonthu” geetetuku.
Shin neeni, “Ta ufaysay in de7iyaro”,
ne biittiya, “Azina gelidaaro” geetetana.
Goday nenan ufaytana;
ne biittiyaka azini de7iyaro gidana.
5 Panthi geela7o ekeysada,
ne nayti nena machana.
Ekeysi geliyarin ufayteysada,
ne Xoossay nenan ufaytana.
6 Neno Yerusalaame, ne dirsa gimbiya bolla
wocheyisata taani wothas;
enti gallasinne qamma si77i gookona.
7 Hinteno, Godaa qofiseysato,
I, Yerusalaame keexana gakanawunne
biitta ubban nashetida katama oothana gakanaw
hinteka shempopite; iyaka shempisopite.
8 Goday ba ushacha kushiyaninne
ba wolqaama qesiyan haysada yaagidi caaqis:
“Taani nam7antho hinte katha
hinte morketi maana mela oothike.
Hinte daaburida hinte woyne ushsha
allagati uyokona.
9 Shin banta kathaa cakidaysati
midi Godaa galatana;
woyne maxeysati ta keethaa dabaaban uyana.
10 Aadhite! Pengera keyidi biite!
Asaas oge giigisite! Wogga oge kessite.
Shuchaa diggite;
kawotethati ogiya demmana mela malla essite.
11 Goday sa7a gaxas
haysada yaagidi awaajis:Isa 40:10; Qon 22:12.
‘Xiyoone asaas haysada yaagite;
heko, hintena Ashsheysi gakis!
Iya gatey iyara de7ees;
I immiya woytoy iya sinthan de7ees’
yaagite.
12 Hinte, ‘Goday Wozida Geeshsha asata’
geetetidi xeegetana.
Yerusalaamey, ‘Koyetiyaronne
Yegeta Attaboona Katamiw’ ” geetetana.